പാലക്കാട്ട് സ്കൂൾ ബസിനടിയിൽപ്പെട്ട് ബൈക്ക് യാത്രികനായ പതിനാറുകാരന് ദാരുണാന്ത്യം

പാലക്കാട്  അകത്തേത്തറയിൽ ബസും ബൈക്കും കൂട്ടിയിടിച്ച് വിദ്യാർത്ഥി മരിച്ചു. ബൈക്ക് യാത്രക്കാരനായ വിദ്യാർത്ഥി റെയിൽവേ കോളനിയ്ക്ക് സമീപം മേലേമുരളി സ്വദേശി വിഷ്ണു (16) വാണ് മരിച്ചത്.

ഇടിയുടെ ആഘാതത്തിൽ ബൈക്കിൽ നിന്നും തെറിച്ച് വീണ് ബസിനടിയിൽപ്പെട്ട് തൽക്ഷണം മരിയ്ക്കുകയായിരുന്നു. അപകടത്തിൽ ബൈക്ക് ഓടിച്ചിരുന്ന സുഹൃത്ത് കൃഷ്ണകുമാറിനെ ഗുരുതര പരിക്കുകളോടെ ജില്ലാ ആശുപത്രിയിൽ പ്രവേശിപ്പിച്ചു.

അകത്തേത്തറ  എൻഎസ്എസ് എഞ്ചിനിയറിംങ് കോളജിൻ്റെ പ്രവേശന കവാടത്തിന് മുമ്പിലാണ് ദാരുണ അപകടം. ഉമ്മിണി ഭാഗത്ത് നിന്നും പാലക്കാട് ഭാരത് മാത സ്കൂളിലെ കുട്ടികളെ ഇറക്കി വന്ന ബസും, എതിർദിശയിൽ ചെക്കിനി പാടത്ത് കളിക്കാൻ പോയി  വരികയായിരുന്ന കുട്ടികളുടെ യമഹ ബൈക്കും നേർക്ക് നേർ ഇടിക്കുകയായിരുന്നു.

ബൈക്കിൻ്റെ പുറകിലിരുന്ന വിഷ്ണു ഇടിയുടെ ആഘാതത്തിൽ ബസിനടിയിലേക്ക് തെറിച്ചു വീഴുകയായിരുന്നു. വിഷ്ണുവിൻ്റെ മൃതദേഹം പോസ്റ്റ്മോർട്ടത്തിനായി ജില്ലാ ആശുപത്രി മോർച്ചറിയിലേക്ക് മാറ്റി.

ഒലവക്കോട്  സെൻറ് തോമസ് സ്കുളിലെ പത്താം  ക്ലാസ് വിദ്യാർഥിയാണ് മരിച്ച വിഷ്ണു. അമ്മ സബിത ആലത്തൂർ സർവ്വീസ് കോ-ഓപ്പറേറ്റീവ് ബാങ്ക് ജീവനക്കാരിയാണ്.