Viral | ഒറ്റയടിക്ക് നാല് കോഴികളെ അകത്താക്കിയ കൂറ്റൻ പെരുമ്പാമ്പിനെ പിടികൂടി

കൊച്ചി: ഒറ്റയടിക്ക് നാല് കോഴികളെ അകത്താക്കിയ കൂറ്റൻ പെരുമ്പാമ്പിനെ പിടികൂടി. ഭൂതത്താൻകെട്ടിലാണ് സംഭവം. ഭൂതത്താൻകെട്ടിൽ ബോട്ട് ജെട്ടിക്കു സമീപമുള്ള വീട്ടിലെ കോഴിക്കൂട്ടിൽക്കയറിയ പെരുമ്പാമ്പ് നാല് കോഴികളെ വിഴുങ്ങുകയും ഒന്നിനെ കൊല്ലുകയും ചെയ്തു.

വെളുപ്പിനെ കോഴിക്കൂട്ടിൽ നിന്ന് ബഹളം കേട്ടതിനെ തുടർന്ന് വീട്ടുകാർ നടത്തിയ പരിശോധനയിലാണ് പെരുമ്പാമ്പിനെ കണ്ടത്.

വനപാലകരെ വിവരമറിയിച്ചതിനെ തുടർന്ന് പാമ്പുപിടുത്ത വിദഗ്ദ്ധൻ മാർട്ടിൻ മേക്കമാലി എത്തി പാമ്പിനെ പിടികൂടുകയായിരുന്നു.

ഏകദേശം 30 കിലോ തൂക്കവും 12 അടി നീളവുമുള്ള പാമ്പിനെ വനപാലകർ പിന്നീട് കരിമ്പാനി വനത്തിൽ തുറന്നു വിട്ടു.

മഴക്കാലത്ത് മലവെള്ളപ്പാച്ചിലിൽ രാജവെമ്പാല ഉൾപ്പെടെയുള്ള പാമ്പുകൾ ഒഴുകിയെത്താൻ സാധ്യതയുള്ളതിനാൽ തീരങ്ങളിൽ താമസിക്കുന്നവർ ജാഗ്രത പാലിക്കേണമെന്ന് മാർട്ടിൻ മേക്കമാലി പറഞ്ഞു. മുമ്പും പാമ്പുകളെ ധാരാളമായി കണ്ടുവരുന്ന മേഖലയാണിത്.

കഴിഞ്ഞ ഒരു മാസത്തിനിടെ മലപ്പുറം വണ്ടൂരിലെ ജനവാസ മേഖലയില്‍ നിന്ന് പിടികൂടിയത് 12 ലധികം പാമ്പുകളെയാണ്. ഇതില്‍ അധികവും മൂര്‍ഖന്‍ പാമ്പുകളാണെന്നതാണ് അപകടകരം. മഴ ശക്തമായതോടെ നാട്ടിന്‍ പുറങ്ങളില്‍ ഇഴജന്തുക്കളുടെ ശല്യം വര്‍ധിക്കുന്നതായി പരാതിയുയരുകയാണ്.

വീടിന് സമീപത്തായുള്ള കോഴിക്കൂട്, കൂട്ടിയിട്ട വിറകുകള്‍, വീടിന്റെ ഉമ്മറപ്പടിയിലിടുന്ന ചവിട്ടി, വീടിനോടു ചേര്‍ന്ന റബര്‍ത്തോട്ടം എന്നിവിടങ്ങളിലാണ് പതിവായി പാമ്പുകളെ കണ്ടുവരുന്നത്. മഴ ശക്തമായതോടെ രാവും പകലും നടുവത്ത് സ്വദേശിയും പാമ്പുപിടുത്തക്കാരനുമായ മണികണ്ഠ കുമാറിന് തിരക്കോട് തിരക്കാണ്. അധികവും പിടികൂടേണ്ടത് പെരുമ്പാമ്പിനേയും, മൂര്‍ഖനേയുമാണെന്ന് മണികണ്ഠ കുമാർ പറയുന്നു. പിടികൂടുന്നവയില്‍ അധികവും മൂര്‍ഖന്‍ ആണെന്നതാണ് ഏറെ അപകടകരമായ കാര്യമെന്നും ഇദ്ദേഹം പറയുന്നു.