തിരുവനന്തപുരത്തേക്ക് വന്ന എയർഇന്ത്യ വിമാനം ആകാശച്ചുഴിയിൽപ്പെട്ടു; രണ്ടു പേർക്ക് പരിക്ക്

തിരുവനന്തപുരം: ഡൽഹിയിൽനിന്ന് കൊച്ചി വഴി തിരുവനന്തപുരത്തേക്ക് വന്ന എയർഇന്ത്യ വിമാനം ആകാശച്ചുഴിയിൽപ്പെട്ടു. സംഭവത്തിൽ രണ്ട് വിമാനജീവനക്കാർക്ക് പരിക്കേറ്റു. തലയ്ക്കേറ്റ പരിക്ക് സാരമുള്ളതല്ലെന്ന് എയർഇന്ത്യ അറിയിച്ചു. വിമാനത്തിന് തകരാർ സംഭവിച്ചെങ്കിലും അത് പരിഹരിച്ച് പിന്നീട് തിരുവനന്തപുരത്തേക്ക് യാത്രതിരിക്കുകയായിരുന്നു.

172 യാത്രക്കാരുമായി വന്ന എ 1467 എയർഇന്ത്യ വിമാനമാണ് ആകാശച്ചുഴിയിൽപ്പെട്ടത്. ഇതേത്തുടർന്ന് കൊച്ചിയിൽ തിരിച്ചറക്കിയ വിമാനം രണ്ടു മണിക്കൂറിന് ശേഷമാണ് തിരുവനന്തപുരത്തേക്ക് തിരിച്ചത്.

സെപ്റ്റംബർ 17ന് ഡൽഹി-വിജയവാഡ വിമാനവും ആകാശച്ചുഴിയിൽപ്പെട്ടിരുന്നു. അന്ന് 174 യാത്രക്കാർ വിമാനത്തിൽ ഉണ്ടായിരുന്നു. സംഭവത്തിൽ ആർക്കും പരിക്ക് ഇല്ലായിരുന്നു.