പൗരത്വ നിയമ ഭേദഗതി; പ്രചാരണത്തിന് അമിത്ഷാ കേരളത്തിൽ: ഗ്രൂപ്പ് വഴക്ക് തീർക്കാൻ ബിജെപിയിൽ ചർച്ച

തിരുവനന്തപുരം: ബിജെപി സംസ്ഥാന പുന:സംഘടന പൂർത്തിയാക്കുന്നതിനും പുതിയ അദ്ധ്യഷനെ തീരുമാനിക്കാനുമുള്ള ചർച്ചകൾ ആരംഭിച്ചു. രണ്ട് മേഖലകളിലായാണ് കേന്ദ്ര പ്രതിനിധികൾ സംസ്ഥാന നേതാക്കളുമായി സമവായ ചർച്ചകൾ നടത്തുക.

പൗരത്വ നിയമ ഭേദഗതിക്ക് അനുകൂലമായ പ്രചാരണ പ്രവർത്തനങ്ങൾക്കായി ദേശീയ അധ്യക്ഷൻ അമിത് ഷാ കേരളത്തിലെത്തുന്നതിന് മുമ്പ് പുതിയ പ്രസിഡന്റിനെ പ്രഖ്യാപ്പിക്കാനാണ് നീക്കം. ശ്രീധരൻ പിള്ളയ്ക്ക് പകരക്കാരനെ പ്രഖ്യാപിക്കാത്തതും പുന:സംഘടന പൂർത്തിയാക്കാത്തതും പാർട്ടിയിൽ പ്രതിസന്ധി സൃഷ്ടിക്കുന്നുണ്ടന്നാണ് കേന്ദ്ര നേതൃത്വത്തിന്റെ വിലയിരുത്തൽ.

രണ്ട് മേഖലകളിലായി സമവായ ചർച്ചകൾ ഇന്ന് മുതൽ ആരംഭിച്ചു. എച്ച് രാജ തെക്കൻ മേഖലയിലെയും നളിൻ കുമാർ കാട്ടീൽ വടക്കൻ മേഖലയിലെയും സമവായ ചർച്ചകൾക്ക് നേതൃത്വം നൽകും. മണ്ഡലം പ്രസിഡന്റുമാരുടെ പുന:സംഘടന നീതിയുക്തമല്ലെന്ന പരാതിയാണ് ഗ്രൂപ്പുകൾക്കുള്ളത്.

ജില്ലാ പ്രസിഡന്റുമാരുടെ തെരഞ്ഞെടുപ്പ് സംബന്ധിച്ചും വലിയ ഗ്രൂപ്പ് വഴക്കാണ് നടക്കുന്നത്. സംസ്ഥാന പ്രസിഡന്‌‍റിനെ തീരുമാനിക്കാനുള്ള യോഗം ചൊവ്വാഴ്ച കൊച്ചിയിൽ ചേരും. ദേശീയ സഹ സംഘടനാ സെക്രട്ടറി ശിവപ്രസാദ്, വക്താവ് ജിവിഎൽ നരസിംഹറാവു എന്നിവർ യോഗത്തിൽ പങ്കെടുക്കും. ഗ്രൂപ്പ്-ജാതി സമവാക്യങ്ങളാണ് പ്രസിഡന്റ് തെരഞ്ഞെടുപ്പ് വൈകിപ്പിക്കുന്നതെന്നാണ് സൂചന.

പൗരത്വ നിയമ ഭേദഗതിക്കെതിരെ നിയമസഭ പ്രമേയം പാസാക്കിയ പശ്ചാത്തലത്തിലും സംസ്ഥാനത്ത് വലിയ പ്രതിഷേധങ്ങൾ തുടരുന്നതിനിടയിലുമാണ് കേന്ദ്ര ആഭ്യന്തരമന്ത്രി കേരളത്തിലെത്തുന്നത്.

ജനുവരി മൂന്നാം വാരം മലബാറിലാകും അമിത് ഷാ പങ്കെടുക്കുന്ന പൊതുയോഗം. അമിത് ഷായ്ക്ക് പുറമെ മറ്റു ദേശീയ നേതാക്കളും ഉടൻ സംസ്ഥാനത്തെത്തും. ആർ എസ് എസും പൗരത്വ നിയമത്തിന് അനുകൂലമായ പ്രചാരണ പ്രവർത്തനങ്ങൾക്ക് തുടക്കമിടുന്നുണ്ട്.