Thirumandhamkunnu pooram|വള്ളുവനാടിന്റെ ദേശപ്പൂരത്തിന് തുടക്കം; തിരുമാന്ധാംകുന്ന് പൂരക്കാഴ്ച്ചകൾ

വള്ളുവനാടിന്റെ ദേശപ്പൂരം അങ്ങാടിപ്പുറം തിരുമാന്ധാംകുന്ന് പൂരത്തിന് (Thirumandhamkunnu pooram) തുടക്കമായി. രാവിലെ 10 മണിയോടെ മൂന്നാനകളുടെ എഴുന്നളളത്തിന്റെ അകമ്പടിയോടെ ഭഗവതിയുടെ ആറാട്ട് തുടങ്ങി.

കോവിഡിനെ തുടർന്ന് രണ്ട് വർഷം പകിട്ടില്ലാതെ കടന്നു പോയ പൂരം ഇക്കുറി കെങ്കേമമായാണ് നടത്തുന്നത്. പൂര ദിവസങ്ങളിൽ പാറക്കടവിൽ നടത്തുന്ന ആറാട്ടാണ് ഏറ്റവും മുഖ്യമായ ചടങ്ങ്. 11 ദിവസം 21 തവണയാണ് ആറാട്ട് എഴുന്നള്ളത്ത്.

ഇത്തവണ പൂരപ്പറമ്പിലെ കലാപരിപാടികള്‍ ഒഴികെയുള്ളവയെല്ലാം ഉണ്ടെന്നതാണ് ഭക്തര്‍ക്കൊപ്പം പൂരപ്രേമികള്‍ക്കും സന്തോഷം നൽകുന്നത്.

ഒന്ന്, ഏഴ്, പത്ത്, പതിനൊന്ന് ദിവസങ്ങളാണ് പൂരത്തില്‍ പ്രധാനം. തട്ടകം കാണാന്‍ പുറപ്പെടുന്ന ഭഗവതിക്കൊപ്പം പരിവാരങ്ങളും ഒരുമിക്കുന്ന പുറപ്പാടോടെ 'പടഹാദി' മുറയിലാണ് തിരുമാന്ധാംകുന്ന് പൂരത്തിന് തുടക്കം. മൂന്നാം ദിവസം കൊടിയേറുന്നതോടെ പൂരം 'ധ്വജാദി' മുറയിലേക്ക് കടക്കും.

മറ്റ് മിക്ക ക്ഷേത്രങ്ങളിലും കൊടിയേറ്റത്തോടെ പൂരത്തിന് തുടക്കമാവുമ്പോള്‍ തിരുമാന്ധാംകുന്നില്‍ മൂന്നാംദിവസമാണ് കൊടിയേറ്റം. നാലാംപൂരത്തിന് മുളയിടല്‍ ചടങ്ങോടെ പൂരം 'അങ്കുരാദി' മുറയിലേക്ക് കടക്കും.

നവധാന്യങ്ങള്‍ മുളയ്ക്കാന്‍ വെക്കുന്ന ചടങ്ങാണ് 'മുളയിടല്‍'. പത്താംപൂരത്തിന് പള്ളിവേട്ട കഴിഞ്ഞെത്തുന്ന ഭഗവതിക്ക് ഒരുക്കുന്ന ശയ്യക്കുചുറ്റും ഇവ വെയ്ക്കും. മുളച്ചുപൊങ്ങിയ നവധാന്യങ്ങളുടെ നടുവിലാണ് ഭഗവതിയുടെ പള്ളിക്കുറുപ്പ്.

ഭൂതഗണങ്ങളുടെ അകമ്പടിയോടെ ഭഗവതി ദേശം കാണാൻ ഇറങ്ങുന്നു എന്നാണ് സങ്കൽപ്പം. അതിനാൽ പൂര ദിവസങ്ങളിൽ തട്ടകത്തിലെ എല്ലാ വീടുകളിൽ നിന്നും ആളുകൾ തിരുമാന്ധാംകുന്നിലേക്ക് ആറാട്ട് തൊഴാൻ എത്തും.

2019-ലാണ് ഒടുവില്‍ പൂര്‍ണമായ രീതിയില്‍ പൂരം ആഘോഷമുണ്ടായത്. കോവിഡ് വ്യാപനത്തെത്തുടര്‍ന്ന് 2020-ലെ മീനത്തില്‍ പൂരം നടത്താനാവാതെ വന്നു. മാര്‍ച്ച് 31-നായിരുന്നു പുറപ്പാട് നടക്കേണ്ടിയിരുന്നത്. ഇത് പിന്നീട് ഒക്ടോബറില്‍(തുലാം) കോവിഡ് നിയന്ത്രണങ്ങള്‍ക്കിടെ ചടങ്ങുകള്‍ മാത്രമായി നടത്തുകയായിരുന്നു. ‌