'കാറിൽ അബ്ദുള്ളക്കുട്ടിയാണെന്ന് അറിയില്ലായിരുന്നു'; അപകടം മനപൂർവമായിരുന്നില്ലെന്ന് ലോറി ഡ്രൈവർ

മലപ്പുറം: ബി.ജെ.പി ദേശീയ ഉപാധ്യക്ഷൻ എ.പി.അബ്ദുള്ളക്കുട്ടിയെ മനപ്പൂര്‍വം വാഹനാപകടത്തില്‍പെടുത്താന്‍ ശ്രമിച്ചിട്ടില്ലെന്ന് ലോറി ഡ്രൈവർ. അപകടമുണ്ടായ കാറിൽ അബ്ദുള്ളക്കുട്ടിയായിരുന്നെന്ന് അറിയില്ലായിരുന്നെന്നും ലോറി ഡ്രൈവർ മുഹമ്മദ് സുഹൈൽ പറഞ്ഞു. ബ്രേക്ക് കിട്ടാതെ ലോറി കാറിൽ ഇടിക്കുകയായിരുന്നെന്നും സുഹൈൽ വ്യക്തമാക്കുന്നു.

സംഭവത്തെ കുറിച്ച് ഡ്രൈവർ പറയുന്നത് ഇങ്ങനെ; "പുത്തനത്താണിയിൽ നിന്നും കോട്ടക്കൽ ഭാഗത്തേക്ക് പോവുകയായിരുന്നു. മുമ്പിൽ ഒരു അഞ്ചാറ് വാഹനങ്ങൾ വരിയായി പോവുകയായിരുന്നു. പെട്ടെന്ന് ഒരു വണ്ടി ബ്രേക്ക് ചെയ്തു . ഞാൻ എന്റെ ടോറസ് ബ്രേക്ക് ചെയ്തു എങ്കിലും നിന്നില്ല. മുൻപിലെ കാറിൽ തട്ടി. പിന്നീട് പൊലീസ് സ്റ്റേഷനിൽ എത്തിയപ്പോഴാണ് കാർ അബ്ദുള്ളക്കുട്ടിയുടേതാണെന്ന് അറിഞ്ഞത്".

അപകടത്തിന് ശേഷം കാറിന് സമീപത്തേക്ക് ചെന്നെങ്കിലും അവർ ശ്രദ്ധിച്ചില്ല. അവർ വേരൊരു കാറിൽ കയറി പോകുകയായിരുന്നെന്നും സുഹൈൽ പറയുന്നു. വെളിയംകോട് ഭാഗത്തേക്ക് പോയിട്ടില്ല. തിരുനാവായ ഭാഗത്ത് നിന്നാണ് വന്നതെന്നും സുഹൈൽ പറഞ്ഞു.

അബ്ദുളളകുട്ടിയുടെ വാഹന അപകടവുമായി ബന്ധപ്പെട്ട് പൊലീസ് വെളിയംകോട് നിന്നും സി.സി ടി.വി ഹാർഡ് ഡിസ്ക് ശേഖരിച്ചിട്ടുണ്ട്. അതിക്രമം നടന്നെന്ന് പരാതിയിൽ പറയുന്ന സ്ഥലത്തുള്ള ദൃശ്യങ്ങളാണ് പൊലീസ് ശേഖരിച്ചത്.

ലോറി ഡ്രൈവറുടെയും ക്ലീനറിന്റേയും മൊബൈൽ കോൾ ലിസ്റ്റും പൊലീസ് പരിശോധിക്കുന്നുണ്ട്. പൊന്നാനി മേഖലയിൽ നിന്നും ഇവർക്ക് അപകടം നടന്ന സമയത്തിനു മുൻപ് കോളുകൾ വന്നിരുന്നോയെന്നാണ് പൊലീസ് പരിശോധിക്കുന്നത്.

വ്യാഴാഴ്ച രാത്രിയാണ് രണ്ടത്താണിയിൽ ബി.ജെ.പി ദേശീയ ഉപാധ്യക്ഷൻ എ.പി. അബ്ദുള്ളക്കുട്ടിയുടെ കാറിൽ ലോറി ഇടിച്ചത്. തന്നെ ഒരുസംഘം വെളിയംകോട് വച്ച് അതിക്രമിച്ചെന്നും അതിന് പിന്നാലെയാണ് വാഹനം അപകടത്തിപ്പെടുത്താൻ ശ്രമം നടന്നതെന്നും അബ്ദുള്ളക്കുട്ടി ആരോപിക്കുന്നു.

അപകടം ആസൂത്രിതമാണെന്നും അബ്ദുള്ളക്കുട്ടിയുടെ ആക്ഷേപം തെളിയിക്കത്തക്കവിധം കാര്യങ്ങൾ കണ്ടെത്താൻ ഇതുവരെ പൊലീസിന് സാധിച്ചിട്ടില്ല. മഴയും ഗതാഗതക്കുരുക്കുമാണ് വാഹനാപകടത്തിന് കാരണമായതെന്നാണ് പൊലീസിന്റെ പ്രാഥമിക റിപ്പോർട്ട് .