അപ്പങ്ങളെമ്പാടും: പൊന്നാനിയുടെ പാരമ്പര്യ രുചികളിലേക്ക് ഒരു കിളിവാതിൽ

ഓരോ ദേശത്തിനും അതിനെ അടയാളപ്പെടുത്തുന്ന ഓരോ രുചിയുണ്ട്.

പൊന്നാനിയെ സംബന്ധിച്ച് ഒരു രുചി അല്ല, ഒരു നൂറായിരം രുചിയാണ്  ആ നാടിനെ ഭക്ഷണപ്രേമികളുടെ ഭൂപടത്തിൽ അടയാളപ്പെടുത്തുന്നത്.

കഴിഞ്ഞദിവസം പൊന്നാനിയിൽ നടന്ന 'അപ്പങ്ങളെമ്പാടും' എന്ന ഭക്ഷ്യമേള പൊന്നാനിയുടെ പാരമ്പര്യ രുചികളിലേക്ക്‌ ഉള്ള കിളിവാതിൽ ആയിരുന്നു.

കൽത്തപ്പം, കിണ്ണത്തപ്പം, കുഴിയപ്പം, അരീരപ്പം, പാലിയത്തപ്പം, മയ്യത്തപ്പം, കാരക്കപ്പം, വിണ്ടിയലുവ, മുട്ടപ്പത്തിരി അങ്ങനെ നീണ്ടു നീണ്ടു കിടക്കുകയാണ് പൊന്നാനിയിലെ പലഹാര പട്ടിക.

ഓരോന്നിനും ചേരുവകൾ വേറെ, ഉണ്ടാക്കുന്ന വിധം വേറെ, രുചിയോ അത്രയും വൈവിധ്യമാർന്നതും.

ഈ പലഹാരങ്ങൾ ഒക്കെ പൊന്നാനിയിലെ പഴയ തലമുറ ചിട്ടപ്പെടുത്തിയത് ആണ്.

കൂട്ടും കൂട്ടലും ഒക്കെ പഴയ രീതിയിൽ തന്നെ. മൂത്തമ്മമാരിൽ നിന്നും ഉമ്മമാരിലേക്കും അവരിൽ നിന്നും പുതിയ തലമുറയിലേക്കും അങ്ങനെ നീണ്ടു കിടക്കുകയാണ് ആ രുചിയുടെ ചങ്ങലക്കണ്ണികൾ.

പണ്ട് പുതിയാപ്ല വിരുന്നിനും പെരുന്നാളിനും മറ്റ് വിശേഷ ദിവസങ്ങളിലും ഒക്കെയാണ് ഈ വിഭവങ്ങൾ ഉണ്ടാക്കിയിരുന്നത്. ഒരു നൂറ്റാണ്ട് മുമ്പത്തെ പൊന്നാനിയെ അറിയാം ഈ രുചികളിലൂടെ.

ഇന്നും അവയുടെ തനിമയിൽ ഒരു തരി പോലും മാറ്റം വരുത്താതെ ആണ് ഇവ ഉണ്ടാകുന്നത്.

പൊന്നാനിയിലെ വീടുകളുടെ അടുക്കളയിൽ മാത്രം നിറഞ്ഞ വിഭവങ്ങൾ പൊതുനിരത്തിൽ എത്തിച്ചത് പുരോഗമന കലാ സാഹിത്യ സംഘം ആയിരുന്നു.

പുകസയുടെ സംസ്ഥാന സമ്മേളനത്തോട് അനുബന്ധിച്ച് ആയിരുന്നു ഈ ഭക്ഷ്യമേള.

ഭക്ഷണം ഒരുക്കിയ ഉമ്മമാരും കഴിച്ച് മനസ്സ് നിറഞ്ഞു കഴിച്ച ആസ്വാദകരും ഒരു പോലെ പുഞ്ചിരിച്ച വേദി ആയിരുന്നു അപ്പങ്ങളെമ്പാടും.