Bakrid | മാസപ്പിറവി കണ്ടു; കേരളത്തിൽ വലിയ പെരുന്നാൾ ജൂലൈ 31 വെള്ളിയാഴ്ച

കോഴിക്കോട്: സംസ്ഥാനത്ത് ബലിപ്പെരുന്നാൾ ജൂലൈ 31 വെള്ളിയാഴ്ച. കാപ്പാട് മാസപ്പിറവി കണ്ടതിന്റെ അടിസ്ഥാനത്തില്‍ ബുധനാഴ്ച(നാളെ) ദുല്‍ഹിജ്ജ ഒന്നായിരിക്കുമെന്ന് ഖാസിമാര്‍ അറിയിച്ചു. ഇതനുസരിച്ചാണ് കേരളത്തില്‍ ബലിപെരുന്നാൾ ജൂലൈ 31 ന് ആയിരിക്കുമെന്ന് ഉറപ്പായത്.

അറഫാദിന നോമ്ബ് 30ന് വ്യാഴാഴ്ച ആയിരിക്കുമെന്നും ഖാസിമാരായ പാണക്കാട് സയ്യിദ് ഹൈദരലി ശിഹാബ് തങ്ങള്‍, സമസ്ത കേരള ജംഇയ്യത്തുല്‍ ഉലമാ പ്രസിഡന്റ് സയ്യിദ് മുഹമ്മദ് ജിഫ്രി മുത്തുക്കോയ തങ്ങള്‍, സമസ്ത ജനറല്‍ സെക്രട്ടറി പ്രൊഫ. കെ. ആലിക്കുട്ടി മുസ്ലിയാര്‍, കോഴിക്കോട് ഖാസി സയ്യിദ് മുഹമ്മദ് കോയ ജമലുല്ലൈലി തങ്ങള്‍ക്ക് വേണ്ടി നാഇബ് ഖാസി സയ്യിദ് അബ്ദുല്ല കോയ ശിഹാബുദ്ദീന്‍ തങ്ങള്‍, സയ്യിദ് നാസര്‍ ഹയ്യ് ശിഹാബ് തങ്ങള്‍ പാണക്കാട് എന്നിവര്‍ അറിയിച്ചു.

ബലി പെരുന്നാള്‍ ജൂലൈ 31 വെള്ളിയാഴ്ചയാണെന്ന് നേരത്തെ സൗദി അറേബ്യയും പ്രഖ്യാപിച്ചിരുന്നു. സൗദിയില്‍ സര്‍ക്കാര്‍, സ്വകാര്യ മേഖലകളിലെ ജീവനക്കാരുടെ പെരുന്നാള്‍ അവധിയും പ്രഖ്യാപിച്ചിട്ടുണ്ട്.

സര്‍ക്കാര്‍ മേഖലയിലെ ജീവനക്കാര്‍ക്ക് രണ്ടാഴ്ചത്തെ പെരുന്നാള്‍ അവധിയുണ്ടാകും. ജൂലൈ 23ലെ പ്രവൃത്തി കഴിയുന്നത് മുതലാണ് അവധി ആരംഭിക്കുക. ഓഗസ്റ്റ് ഒമ്പത് വരെയാണ് അവധി.

അതേസമയം, സ്വകാര്യ മേഖലയിലെ ജീവനക്കാര്‍ക്ക് ജൂലൈ 29 മുതല്‍ ആഗസ്റ്റ് രണ്ട് വരെയാണ് അവധി.

ഹജ്ജിന്റെ സുപ്രധാന ചടങ്ങായ അറഫാ സംഗമം ജൂലൈ 30 വ്യാഴാഴ്ച ആയിരിക്കും. ഇത്തവണ സൗദിക്ക് പുറത്തുനിന്നുള്ള രാജ്യങ്ങളിൽനിന്ന് ഹജ്ജ് തീർഥാർകരെ അനുവദിക്കുന്നില്ല.