Bev Q App | ' ഇപ്പ ശരിയാക്കി തരാമെന്ന് ഇടയ്ക്കിടെ പറയേണ്ട'; കമ്പനി കാണുന്നുണ്ടോ പേജിലെ ട്രോൾ യുദ്ധം?

തിരുവനന്തപുരം: മദ്യ വിതരണത്തിനുള്ള ആപ്പിനു വേണ്ടി മലയാളിയുടെ കാത്തിരുപ്പ് തുടങ്ങിയിട്ടു മൂന്നാഴ്ചയിലധികമായി. ഇതിനിടയിലാണ് നാളെ മദ്യ വിതരണം തുടങ്ങുമെന്ന മന്ത്രിയുടെ അറിയിപ്പും പുറത്തുവന്നത്. എന്നാൽ പ്ലേസ്റ്റോറിൽ 'ബെവ് ക്യൂ' ആപ്പ് മാത്രം ഇതുവരെ വന്നില്ല. ഇതോടെ ആപ്പ് ഡെവലപ് ചെയ്യുന്ന ഫെയർകോഡ‍് കമ്പനിയുടെ ഫേസ്ബുക്ക് പേജിൽ ട്രോളും കമന്റുകളുമായി സംസ്ഥാനത്തിന്റെ വരുമാനദാതാക്കളായ 'കുടിയൻ'മാർ നിരന്നു.

മണിക്കൂറുകളോളം പ്ലേസ്റ്റോർ റിഫ്രഷ് ചെയ്ത് മടുത്താണ് പലരും കമന്റ് ചെയ്തിരിക്കുന്നത്. 'പറ്റില്ലെങ്കിൽ കളഞ്ഞിട്ട് പോടെ' എന്ന കമന്റാണ് പലരും രേഖപ്പെടുത്തിയിരിക്കുന്നത്.

"ആപ്പല്ലേ ആശാനെ ഉണ്ടാകാൻ പറഞ്ഞത് അല്ലാതെ mesile ഒന്നും അല്ലാലോ ഒന്ന് പുറത്ത് ഇറക്കടെ.." - വളരെ ദയനീയമായി ഒരാൾ പറയുന്നു. ഇതിനിടെ ആപ്പിന്റെ ബീറ്റാ വേർഷൻ ചോർന്നിരുന്നു. ഇത് ഇൻസ്റ്റാൾ ചെയ്തവരും കമന്റുമായി എത്തിയിട്ടുണ്ട്.

എസ്.എം.എസ് അയച്ചവർ വീണ്ടും അയയ്ക്കണമെന്ന അറിയിപ്പും പലരെയും പ്രകിപിച്ചിട്ടുണ്ടെന്ന് കമന്റുകളിൽ വ്യക്തം. "അണ്ണാ കുപ്പി കിട്ടുമോ ഇല്ലയോ..ഒന്നു തെളിച്ചു പറ.. നാളെ ലീവ് എടുക്കാൻ വേണ്ടിയാ"- ഒരാളുടെ ചോദ്യം ഇങ്ങനെ.

"പറ്റില്ലേൽ കളഞ്ഞിട്ടു പോടെ... കുറെ നേരമായി ഇപ്പ ശരിയാക്കി തരാമെന്ന് പറയുന്നു." എന്നും മറ്റൊരാൾ കമന്റ് ചെയ്യുന്നു. ഇതിനിടെ ആശ്ലീല കമന്റുകളുമായും ചിലർ രംഗത്തെത്തിയിട്ടുണ്ട്.