ഭീമമായ നഷ്ടം; മദ്യം വാങ്ങാനുള്ള ടോക്കൺ സംവിധാനം അവസാനിപ്പിക്കണമെന്ന് ബിവറേജസ് കോർപറേഷൻ

തിരുവനന്തപുരം: ബാറുകളുടെ പ്രവർത്തനം സാധാരണ നിലയിലായ സാഹചര്യത്തിൽ ബിവറേജസ് ഔട്ട്ലെറ്റുകളിലൂടെ മദ്യം വാങ്ങുന്നതിനുള്ള ടോക്കൺ സംവിധാനം അവസാനിപ്പിക്കണമെന്ന് ബിവറേജസ് കോർപറേഷൻ സർക്കാരിനോട് ആവശ്യപ്പെട്ടു. ടോക്കൺ ഏർപ്പെടുത്തുന്നതിന് മുൻപുണ്ടായിരുന്ന രീതിയിലേക്ക് പോകണമെന്നാണ് ആവശ്യം.

കോവി‍ഡ് മാനദണ്ഡം പാലിച്ചും ശാരീരിക അകലം പാലിച്ചും വിൽപന നടത്താൻ സൗകര്യമൊരുക്കണമെന്നും സർക്കാരിന് നൽകിയ കത്തിൽ ബെവ്കോ ആവശ്യപ്പെട്ടു. ടോക്കൺ സംവിധാനം വന്നതോടെ ഭീമമായ നഷ്ടമാണ് കോർപറേഷൻ നേരിടുന്നത്. ഈ സാഹചര്യത്തിലാണ് പഴയരീതിയിലേക്ക് മടങ്ങണമെന്ന് ആവശ്യപ്പെട്ട് കോർപറേഷൻ സർക്കാരിന് മുന്നിലെത്തിയത്.

 കോവിഡ് ലോക്ഡൗണിനുശേഷം കഴിഞ്ഞ മേയ് 28 മുതലാണ് മദ്യവിൽപ്പന ആരംഭിച്ചത്. ബെവ്ക്യൂ ആപ്പ് വഴി ബിവറേജസ്, കൺസ്യൂമർഫെഡ് ഷോപ്പുകളിലും ബാറുകളിലും ഒരേ വിലയ്ക്കു മദ്യം വിൽക്കാൻ സർക്കാർ തീരുമാനിച്ചശേഷം വലിയ നഷ്ടമാണ് കോർപറേഷനുണ്ടായത്. പ്രായമുള്ളവരടക്കമുള്ള പതിവ് ഉപയോക്താക്കൾ ബാറിലേക്ക് പോയതോടെയാണ് ബെവ്കോയുടെ നഷ്ടം വർധിച്ചത്.

ബിവറേജസ് കോർപറേഷന്റെ 265 ഔട്ട്ലറ്റുകളിൽ ലോക്ഡൗണിന് മുൻപ് ഒരു ദിവസം ശരാശരി 22 കോടിരൂപ മുതൽ 32 കോടിരൂപവരെയുള്ള കച്ചവടമാണ് നടന്നിരുന്നത്. ടോക്കൺ ഏർപ്പെടുത്തിയതോടെ ഇത് പകുതിയായി. കൺസ്യൂമർഫെഡിന്റെ പ്രതിദിന വിൽപ്പന ശരാശരി 6 കോടി രൂപയായിരുന്നെങ്കിൽ ഇപ്പോഴത് ശരാശരി 2.5 കോടിയായി കുറഞ്ഞിട്ടുണ്ട്.

പ്രീമിയം കൗണ്ടറിലൂടെ 800ഉം സാധാരണ കൗണ്ടറിലൂടെ 600‌ഉം ടോക്കണാണ് ബെവ്ക്യൂ ആപ്പിലൂടെ നൽകുന്നത്. പ്രതിദിനം 1 ലക്ഷം മുതൽ 1.5ലക്ഷംവരെ ടോക്കൺ ബുക്ക് ചെയ്യപ്പെടാറുണ്ട്. ക്രിസ്മസ് സമയത്ത് പ്രതിദിന ബുക്കിങ് 2-2.5 ലക്ഷം ടോക്കണായി ഉയർന്നെങ്കിലും പിന്നീട് കുറഞ്ഞിരുന്നു. തിരിച്ചടിയായി.