EXCLUSIVE;തൃപ്തിയുടെ RSS ബന്ധ ആരോപണം തെറ്റിദ്ധരിപ്പിക്കാൻ; തൃപ്തിക്ക് ബന്ധമുണ്ടെങ്കിൽ അത് കോൺഗ്രസുമായി:ബിന്ദു അമ്മിണി

കൊച്ചി: ഭൂമാതാ ബ്രിഗേഡ് നേതാവ് തൃപ്തി ദേശായിയുടെ വരവിന് പിന്നിൽ രാഷ്ട്രീയ ഗൂഡാലോചനയില്ലെന്ന് ബിന്ദു അമ്മിണി. ആർഎസ്എസുമായി ബന്ധമുണ്ടെന്ന തരത്തിൽ ഉയരുന്ന ആരോപണങ്ങൾ ജനങ്ങളെ തെറ്റിദ്ധരിപ്പിക്കാൻ വേണ്ടി നടത്തുന്നതാണെന്നും ബിന്ദു അമ്മിണി ന്യൂസ് 18നോട് പറഞ്ഞു.

2011ൽ തൃപ്തി കോൺഗ്രസ് സ്ഥാനാർഥിയായി മത്സരിച്ചിച്ചുണ്ടെന്ന് അവർ തന്നെ പറഞ്ഞിട്ടുള്ളതാണെന്നും തൃപ്തിക്ക് ബന്ധമുണ്ടെങ്കിൽ അത് കോൺഗ്രസുമായിട്ടായിരുന്നെന്നും ബിന്ദു പറഞ്ഞു.

നിലവിൽ തൃപ്തിക്ക് ഒരു രാഷ്ട്രീയ പാർട്ടിയുമായും ബന്ധമില്ലെന്നും അവർ വ്യക്തമാക്കി. താനൊരു സാമൂഹ്യ പ്രവർത്തകയാണെന്നും ഒരു രാഷ്ട്രീയ പാർട്ടിയുമായും നിലവിൽ ബന്ധമില്ലെന്നുമാണ് തൃപ്തി പറഞ്ഞതെന്നും ബിന്ദു അമ്മിണി പറയുന്നു.

വ്യക്തിപരമായ താത്പര്യത്തിന്റെ ഭാഗമായാണ് തൃ പ്തിക്കൊപ്പം കഴിഞ്ഞ ദിവസം ശബരിമല ദർശനത്തിന്പോയതെന്നും ബിന്ദു അമ്മിണി പറഞ്ഞു. ശബരിമല ദർശനത്തിന് പൊലീസ് സംരക്ഷണം നൽകാത്ത നടപടിക്കെതിരെ കോടതിയെ സമീപിക്കുമെന്നും അവര്‍ പറഞ്ഞു.

സ്ത്രീപ്രവേശനത്തിനെതിരെ സംസാരിച്ച മന്ത്രി കടകംപള്ളിക്കെതിരെ കോടതിയലക്ഷ്യത്തിന് കേസെടുക്കണം.പൊലീസ് സംരക്ഷണം ലഭിച്ചാൽ ശബരിമല ദർശനം നടത്തും- ബിന്ദു അമ്മിണി പറഞ്ഞു.