തിരൂരിൽ ബിജെപിയുടെ CAA അനുകൂല റാലി; അപ്രഖ്യാപിത ഹർത്താൽ നടത്തി പ്രതിഷേധക്കാർ

ബിജെപിയുടെ പൗരത്വ ബിൽ വിശദീകരണ യോഗം നടക്കുന്നയിടങ്ങളിലെല്ലാം  പ്രതിഷേധങ്ങൾ ശക്തമാവുകയാണ്. എവിടെ യോഗം നടന്നാലും അവിടെ പ്രതിഷേധങ്ങളും ഉയരുന്നു.

തിരൂരിൽ കടകൾ അടച്ചും ബസ് സർവീസ് നിർത്തി വച്ചും ആയിരുന്നു എതിർപ്പ് അറിയിച്ചത്. കേന്ദ്ര മന്ത്രി സോം പ്രകാശ്, ബിജെപി സംസ്ഥാന ജനറൽ സെക്രട്ടറി കെ സുരേന്ദ്രൻ, യുവ മോർച്ച സംസ്ഥാന സെക്രട്ടറി സന്ദീപ് ജി വാര്യർ തുടങ്ങിയവർ ആയിരുന്നു പൗരത്വ ബില്ലിനെ അനുകൂലിച്ച് സംസാരിക്കാൻ എത്തിയവർ.

300 ഓളം പേർ  പങ്കെടുത്ത പ്രകടനം ഒരു വശത്ത് തുടങ്ങിയപ്പോൾ തന്നെ മറുവശത്ത് വ്യാപാരികൾ കട അടച്ചു തുടങ്ങി. പിന്നാലെ ബസ് ജീവനക്കാർ സർവീസും നിർത്തി വച്ചു.

 ഇതോടെ സാധാരണക്കാർ ആണ് ശരിക്കും വലഞ്ഞത്. ഒരു അപ്രഖ്യാപിത ഹർത്താലിന്റെ പ്രതീതി ആയിരുന്നു തിരൂരിൽ വ്യാഴാഴ്ച വൈകുന്നേരം മുതൽ. തിരൂർ റെയിൽവേ സ്റ്റേഷനിൽ വന്നിറങ്ങിയ ആളുകൾ മുതൽ ജോലി കഴിഞ്ഞ് വീട്ടിലേക്ക് മടങ്ങുന്നവർ വരെ വലഞ്ഞു.

താലിബാൻ മാതൃകയാണ് കേരളവും സർക്കാരും പിന്തുടരുന്നത് എന്നായിരുന്നു ഇക്കാര്യങ്ങളിൽ കെ സുരേന്ദ്രന്റ പ്രതികരണം.

അതേ സമയം ബിജെപിയുടെ സമ്മേളന സമയം കടകൾ അടയ്ക്കണം എന്ന് സോഷ്യൽ മീഡിയ വഴി പ്രചരണം നടത്തിയവർക്കെതിരെ പോലീസ് കേസെടുത്തു.  അപ്രഖ്യാപിത ഹർത്താലിന് ആഹ്വാനം ചെയ്തതിന് ആണ് പോലീസ് കേസെടുത്തത്. പോസ്റ്റ് ഇട്ടവരെയും ഷെയര് ചെയ്തവരെയും കണ്ടെത്താൻ പോലീസ് അന്വേഷണം ഊർജ്ജിതമാക്കിയിട്ടുണ്ട്.