ഓമശ്ശേരിയിലെ 'ജല്ലിക്കെട്ട്': വിരണ്ടോടിയ പോത്തിന് പുറകേ നാട്ടുകാരുടെ ഓട്ടം; നിരവധി പേർക്ക് കുത്തേറ്റു

കഴിഞ്ഞദിവസം ഓമശ്ശേരി  വേനപ്പാറയിൽ ലോറിയിൽ നിന്ന്  ഇറക്കുന്നതിനിടെ വിരണ്ടോടിയ  പോത്തിനെ നീണ്ട പരിശ്രത്തിനൊടുവിൽ മുക്കം ഫയർഫോസ് പിടിച്ചുകെട്ടി.

വ്യഴാഴ്ച  വൈകിട്ട് നാലു മണിയോടെ ഓമശ്ശേരി വേനപ്പാറയിൽ കർണാടകയിൽ നിന്നും അറവ്ശാലയിലേക്ക് ലോറിയിൽ കൊണ്ടുവന്ന പോത്തിനെ ഇറക്കുന്നതിനിടെ കയറു പൊട്ടിച്ച് ഓടുകയായിരുന്നു. തുടർന്ന് തൊട്ടടുത്ത മലമുകളിലൂടെ കയറി ഓമശ്ശേരി അങ്ങാടിയിൽ എത്തിയ പോത്ത് ബൈക്ക് യാത്രക്കാർ ഉൾപ്പെടെ നിരവധി പേരെ അക്രമിക്കുകയും ചെയ്തു.

പോത്തിനെ പിടിക്കാൻ നാട്ടുകാരും പിറകെ കുതിച്ചു പാഞ്ഞു. ലിജോ പെല്ലിശ്ശേരിയുടെ 'ജല്ലിക്കെട്ട്' സിനിമയെ അനുസ്മരിക്കുന്ന രംഗങ്ങളാണ് പിന്നീട് അരങ്ങേറിയത്. പോത്തിന്റെ ആക്രമണത്തിൽ പരിക്കേറ്റ മൂന്നു പേരെ കഴിഞ്ഞദിവസം  ആശുപത്രിയിൽ പ്രവേശിപ്പിച്ചിരുന്നു.

ഇന്ന് രാവിലെ ഓമശ്ശേരി മുടൂർ വരിക്കോട്ടുചാലിൽ പ്രദേശത്ത് വെച്ച് നാട്ടുകാരും പോത്തും ഏറ്റുമുട്ടി. തുടർന്ന് മുക്കത്ത് നിന്ന് ഫയർഫോഴ്സ് എത്തി. ഒരു വീട്ടുമുറ്റത്ത് നിലയുറപ്പിച്ച പോത്തിനെ  കയർ ഉപയോഗിച്ച് പിടിച്ചുകെട്ടാൻ ശ്രമിച്ചെങ്കിലും വീണ്ടും വിരണ്ടോടി.

തുടർന്ന് ഫയർ ആൻഡ് റെസ്ക്യൂ ഓഫീസറായ നജ്മുദ്ദീൻ ഇല്ലത്തൊടി മരത്തിൽ കയറി അതിസാഹസികമായി പോത്തിനെ  കയറിട്ടു പിടിച്ചൊതുക്കുകയായിരുന്നു. പോത്തിന്റെ മുന്നിൽ ആക്രമണത്തിൽ ഇന്നും നിരവധി പേർക്ക് പരിക്കേറ്റു.