'തസ്ക്കരനെങ്കിലും ഭക്തൻ'; ഭഗവാന് കാണിക്കയർപ്പിച്ച് മോഷണം; ഭണ്ഡാരം കുത്തിത്തുറന്ന് മോഷ്ടിച്ച കള്ളൻ CCTVയിൽ

കണ്ണൂർ തിരൂർകുന്ന് മഹാഗണപതി ക്ഷേത്രത്തിൽ കവർച്ച നടത്തിയ കള്ളന്റെ ദൃശ്യങ്ങൾ പുറത്ത്. കഴിഞ്ഞദിവസം ക്ഷേത്രത്തിലെത്തി ഭണ്ഡാരങ്ങൾ തകർത്ത് മോഷണം നടത്തിയ പ്രതിയുടെ ദൃശ്യങ്ങൾ സിസിടിവിയിൽ വ്യക്തമായി. കള്ളനെ സംബന്ധിച്ച് ചില സൂചനകൾ കതിരൂർ പോലീസിന് ലഭിച്ചിട്ടുണ്ട്.

കഴിഞ്ഞ ചൊവ്വാഴ്ച പുലർച്ചെ രണ്ടു മണിയോടെയാണ് കൂത്ത്പറമ്പ് തിരൂർകുന്ന് മഹാഗണപതി ക്ഷേത്രത്തിൽ കള്ളൻ എത്തിയത്. പരിസരം ഒക്കെ നിരീക്ഷിച്ചു കള്ളൻ ഗേറ്റ് ചാടിക്കടന്നാണ് അമ്പലത്തിൽ കയറിയത്.

ക്ഷേത്രത്തിനകത്തുള്ള ആദ്യത്തെ ഭണ്ഡാരം തുറന്നു പണം അപഹരിച്ചു. ആദ്യ ദണ്ഡാരത്തിൽ നിന്ന് ലഭിച്ച പണത്തിൽ നിന്ന് ഒരു വിഹിതം ഭഗവാന് കാണിക്കയർപ്പിച്ച് ആണ് അടുത്ത ഭണ്ഡാരം പൊളിക്കുന്നത്. ഉദ്ദേശം ഒരു മണിക്കൂറോളം കള്ളൻ ക്ഷേത്രപരിസരത്ത് ചെലവഴിച്ചു എന്നാണ് പോലീസിൻറെ നിഗമനം.

കള്ളന്റെ ചെരിപ്പും തോർത്തും പോലീസ് കണ്ടെടുത്തിട്ടുണ്ട്. പൊളിച്ച് ഭണ്ഡാരത്തിലെ പൂട്ട് ക്ഷേത്ര പരിസരത്തുനിന്ന് തന്നെ പോലീസിന് ലഭിച്ചു.

ഗണപതി ക്ഷേത്രത്തിനടുത്തുള്ള കോട്ടയം തൃക്കൈക്കുന്ന് മഹാദേവ ക്ഷേത്രത്തിലും ഇതെ ദിവസം തന്നെ മോഷണശ്രമം നടന്നിട്ടുണ്ട്. രണ്ടിടത്തും കയറിയത് ഒരേ കളളനാണ് എന്നാണ് പോലീസിൻറെ കണക്കുകൂട്ടൽ. കണ്ണൂർ ജില്ലയിൽ ക്ഷേത്രങ്ങളിൽ കവർച്ച വർധിക്കുന്ന സാഹചര്യത്തിൽ പോലീസ് പരിശോധന ഊർജിതമാക്കിയിട്ടുണ്ട്.