നിലമ്പൂർ നാടുകാണി ചുരത്തിൽ സിമന്റ് ലോറിക്ക് തീപിടിച്ചു; ലോറി ഡ്രൈവർ ഓടി രക്ഷപ്പെട്ടു

മലപ്പുറം: നിലമ്പൂർ - നാടുകാണി ചുരത്തിൽ വീണ്ടും ലോറിക്ക് തീ പിടിച്ചു. അന്തർ സംസ്ഥാന പാതയായ സി എൻ ജി റോഡിൽ വഴിക്കടവ് നാടുകാണി ചുരത്തിലെ ആനമറി  ചെക്പോസ്റ്റിനു സമീപം ഒന്നാം വളവിൽ ലോറി കത്തി നശിച്ചു.

കർണാടകയിലെ ബെല്ലാരിയിൽ നിന്ന് സിമന്റുമായി നിലമ്പൂർ ഭാഗത്തേക്ക് വരികയായിരുന്ന  KL 10 AZ 7309 ഭാരത് ബെൻസ് ലോറിക്കാണ് വെള്ളിയാഴ്ച പുലർച്ചെ 2:30ന് തീ പിടിച്ചത്. ചുരമിറങ്ങി വരുന്നതിനിടയിൽ ലോറിയുടെ പിൻ ഭാഗത്ത് ടയറിനു തീ പിടിച്ചതോടെ ഡ്രൈവർ വാഹനം റോഡരികിലേക്ക് പാർക്ക് ചെയ്തു.

തീ ആളിപ്പടരുന്നത് കണ്ട ഡ്രൈവർ പാലക്കാട് ശ്രീകൃഷ്ണപുരം സ്വദേശി കെ. ജയകൃഷ്ണൻ വാഹനത്തിൽ നിന്നിറങ്ങി ഓടിപ്പോയി എക്സൈസ് ചെക്പോസ്റ്റിൽ വിവരം അറിയിക്കുകയായിരുന്നു. തുടർന്ന് പൊലീസിലും നിലമ്പൂർ ഫയർ ഫോഴ്സിലും വിവരമറിയിച്ചു.

[caption id="attachment_310123" align="aligncenter" width="1280"] സ്റ്റേഷൻ ഓഫീസർ എം. അബ്ദുൽ ഗഫൂർ, സീനിയർ ഫയർ ആൻഡ് റെസ്ക്യൂ ഓഫീസർ കെ. യൂസഫലി എന്നിവരുടെ നേതൃത്വത്തിൽ നിലമ്പൂരിൽ നിന്ന് രണ്ട് യൂണിറ്റ് ഫയർ ഫോഴ്‌സ് എത്തി ഒരു മണിക്കൂറോളം നേരത്തെ ശ്രമത്തിനൊടുവിലാണ് തീ പൂർണമായും അണച്ചത്.

ലോറിയും സിമന്റ് ചാക്കുകളും കത്തി നശിച്ചു. കൊണ്ടോട്ടി സ്വദേശി പുത്തൻകാവിൽ വീട്ടിൽ ഉമ്മർഹാജിയുടെ ഉടമസ്ഥതയിലുള്ള ലോറിയാണ് കത്തി നശിച്ചത്. ഒരു വർഷത്തിനിടയിൽ മൂന്നാമത്തെ ലോറിയാണ് ചുരം പാതയിൽ തീ പിടിക്കുന്നത്. ഫയർ ആൻഡ് റെസ്ക്യൂ ഓഫീസർമാരായ എം വി അനൂപ്, എ എസ് പ്രദീപ്‌, കെ രമേഷ്, എ ശ്രീരാജ്, സി വിനോദ്, എൽ ഗോപാലകൃഷ്ണൻ, എൻ മെഹബൂബ് റഹ്മാൻ, ഹോം ഗാർഡുമാരായ എൻ രവീന്ദ്രൻ, ജിമ്മി മൈക്കൽ എന്നിവരും വഴിക്കടവ് പൊലീസ്, എക്സൈസ് എന്നിവരും ചേർന്നാണ് തീ അണച്ചത്.