അന്തരീക്ഷ വിവരങ്ങൾ ഇനി തത്സമയം; സംസ്ഥാനത്ത് കേന്ദ്ര കാലാവസ്ഥ വകുപ്പിന്റെ 15 ഓട്ടോമാറ്റിക്ക് മാപിനികൾ

മഴയുടെ അളവ്, കാറ്റിന്റെ വേഗത, ദിശ, അന്തരീക്ഷ ആർദ്രത, താപനില തുടങ്ങിയ ദിനാന്തരീക്ഷ വിവരങ്ങൾ തത്സമയം ലഭ്യമാകും എന്നതാണ് AWSകളുടെ പ്രത്യേകത.

ദുരന്ത നിവാരണ പ്രവർത്തനങ്ങൾക്ക് തത്സമയ വിവരങ്ങൾ പ്രധാനപ്പെട്ടതായതിനാൽ കേരളം 2018 മുതൽ കേന്ദ്ര ആഭ്യന്തര മന്ത്രാലയത്തോടും കേന്ദ്ര കാലാവസ്ഥ വകുപ്പിനോടും ഓട്ടോമാറ്റിക് കാലാവസ്ഥ മാപ്പിനി സ്ഥാപിക്കണമെന്ന് ആവശ്യമുന്നയിച്ചിരുന്നു.

കേരളത്തിന്റെ ആവശ്യം പരിഗണിച്ച് കേന്ദ്ര സർക്കാർ കേരളത്തിനായി അനുവദിച്ച 100 AWSകളിൽ 15 AWSകളാണ് ആദ്യഘട്ടത്തിൽ സ്ഥാപിച്ചത്. ഇതിനായി ഫീൽഡ് സർവേ നടത്തി കണ്ടെത്തിയ 10 മീറ്റർ ചുറ്റവിലുള്ള സ്ഥലം സംസ്ഥാന ദുരന്ത നിവാരണ അതോറിറ്റി സജ്ജമാക്കി നൽകി.

ഇത്തരത്തിൽ 138 സ്ഥലങ്ങളാണ് 10*10 മീറ്റർ ചുറ്റളവിൽ ദുരന്ത നിവാരണ അതോറിറ്റി സംസ്ഥാനത്താകെ കണ്ടെത്തി നൽകിയിട്ടുള്ളത്. ഉരുൾപൊട്ടൽ, വെള്ളപ്പൊക്കം തുടങ്ങിയ ദുരന്ത സാധ്യതകൾ, നിലവിൽ വിവരങ്ങൾ ലഭ്യമല്ലാത്ത പ്രദേശങ്ങൾ, അണക്കെട്ടുകൾ, KSEB, ജലസേചന വകുപ്പ്, വാട്ടർ അതോറിറ്റി എന്നീ വകുപ്പുകളുടെ നിർദേശങ്ങൾ തുടങ്ങിയവ പരിഗണിച്ചു കൊണ്ടാണ് ദുരന്ത നിവാരണ അതോറിറ്റി സ്ഥലങ്ങൾ കണ്ടെത്തിയത്.

വെള്ളരിക്കുണ്ട് (കാസറഗോഡ്), ഇരിക്കൂർ (കണ്ണൂർ), കക്കയം (കോഴിക്കോട്), പടിഞ്ഞാറത്തറ ഡാം (വയനാട്), പറവണ്ണ TMG കോളേജ് (മലപ്പുറം), വെള്ളിനേഴി (പാലക്കാട്), ചാലക്കുടി, പെരിങ്ങൽക്കുത്ത് (തൃശൂർ), പറവൂർ (എറണാകുളം), പീരുമേട് (ഇടുക്കി), പൂഞ്ഞാർ എഞ്ചിനിയറിങ് കോളേജ് (കോട്ടയം), കഞ്ഞിക്കുഴി (ആലപ്പുഴ), സീതത്തോട് (പത്തനംതിട്ട), വെസ്റ്റ് കല്ലട (കൊല്ലം), നെയ്യാറ്റിൻകര (തിരുവനന്തപുരം) എന്നിവിടങ്ങളിലാണ് ആദ്യഘട്ടത്തിൽ AWS കൾ സ്ഥാപിച്ചിട്ടുള്ളത്.