നടൻ മധുവിനെക്കുറിച്ച് വ്യാജവാർത്ത പ്രചരിപ്പിച്ചവർക്കെതിരെ അന്വേഷണം

തിരുവനന്തപുരം: ചലച്ചിത്ര താരം മധുവിനെക്കുറിച്ച് വ്യാജവാർത്ത പ്രചരിപ്പിച്ചവരെ കണ്ടെത്തി നിയമ നടപടി സ്വീകരിക്കും. ഇതു സംബന്ധിച്ച് മധുവിന്റെ മകൾ ഉമ നായർ പരാതി നൽകിയിരുന്നു.

മധു അന്തരിച്ചു എന്ന മട്ടിലുള്ള പ്രചാരണമാണുണ്ടായത്. പരാതി അടിയന്തര പ്രാധാന്യത്തോടെ അന്വേഷിക്കാൻ മുഖ്യമന്ത്രിയുടെ ഓഫീസ് പൊലീസിനോടാവശ്യപ്പെട്ടു.

സെലിബ്രിറ്റികൾക്കെതിരെ വ്യാജ വാർത്തകൾ സോഷ്യൽ മീഡിയയിലൂടെ പ്രചരിക്കുന്നത് പതിവായിരിക്കുകയാണ്. ചലച്ചിത്രതാരങ്ങൾ മരണപ്പെട്ടുവെന്ന തരത്തിലുള്ള വാർത്തകളാണ് കൂടുതലും പ്രചരിക്കാറുള്ളത്. നേരത്തെ നടൻ ജഗതി ശ്രീകുമാർ, നടി രേഖ, ഗായിക എസ്. ജാനകി എന്നിവരെക്കുറിച്ചും ഇത്തരത്തിൽ വാർത്തകൾ പ്രചരിച്ചിരുന്നു.