പുതുവർഷത്തിൽ 10 പദ്ധതികൾ; മുഖ്യമന്ത്രിയുടെ പ്രഖ്യാപനത്തിൽ എന്തൊക്കെ?

തിരുവനന്തപുരം: മുതിർന്ന പൌരൻമാർക്കുള്ള സേവനം വീട്ടുപടിക്കൽ ലഭ്യമാക്കുന്നത് ഉൾപ്പടെ 10 പുതിയ പദ്ധതികൾ കൂടി സംസ്ഥാന സർക്കാർ പ്രഖ്യാപിച്ചു. പുതുവർഷ ദിനത്തിൽ മുഖ്യമന്ത്രി പിണറായി വിജയനാണ് പദ്ധതികൾ പ്രഖ്യാപിച്ചത്. സർക്കാർ നടപ്പാക്കി വരുന്ന നൂറുദിന പദ്ധതികൾക്കു പുറമെയാണിത്. അവ ഏതൊക്കെയെന്ന് നോക്കാം...

1. വിവിധ സേവനങ്ങൾ ലഭ്യമാക്കാനായി മുതിർന്ന പൌരൻമാർ സർക്കാർ ഓഫീസുകളിലെത്തുന്നത് ഒഴിവാക്കും. ഇത് വീടുകളിലെത്തിച്ചു നൽകും. മസ്റ്ററിങ്, ലൈഫ് സർട്ടിഫിക്കറ്റ്, സാമൂഹിക സുരക്ഷ പെൻഷൻ അപേക്ഷ, സിഎംഡിആർഎഫ് സഹായം, ജീവൻരക്ഷാ മരുന്നുകൾ എന്നിവയാണ് ആദ്യം വീടുകളിൽ എത്തിച്ചു നൽകുക. ഇതിനുള്ള വിജ്ഞാപനം ജനുവരി 10ന് അകം പുറത്തിറക്കും.

2. 65 വയസിന് മുകളിൽ പ്രായമുള്ളവരുടെയും ഭിന്നശേഷിക്കാരുടെയും ആവശ്യങ്ങൾ വീടുകളിലെത്തി ലഭ്യമാക്കുന്ന പദ്ധതി ജനുവരി 15ന് ആരംഭിക്കും.

3. സാമ്പത്തികമായി പിന്നാക്കം നിൽക്കുന്ന വിദ്യാർഥികൾക്ക് സ്കോളർഷിപ്പും, രാജ്യാന്തര പ്രമുഖരുമായി ബിരുദ ബിരുദാനന്തര വിദ്യാർഥികൾക്ക് ആശയവിനിമയം സാധ്യമാക്കുന്ന എമിനന്‍റ് സ്കോളേഴ്സ് ഓൺലൈൻ പരിപാടിയും ഈ മാസം ആരംഭിക്കും. വാർഷിക വരുമാനം രണ്ടരലക്ഷം രൂപയിൽ താഴെയുള്ള കുടുംബങ്ങളിലെ മികച്ച മാർക്ക് നേടുന്ന 1000 വിദ്യാർഥികൾക്ക് ഒരു ലക്ഷം രൂപ വരെ വിദ്യാർഥി പ്രതിഭ ധനസഹായ പദ്ധതി പ്രകാരം സ്കോളർഷിപ്പ് ലഭിക്കും.

4. അഴിമതിമുക്ത കേരളം പദ്ധതി പ്രകാരം, സർക്കാർ ഓഫീസുകളിലെ അഴിമതി സംബന്ധിച്ച് വിവരം കൈമാറാൻ പ്രത്യേക സോഫ്റ്റ്വെയർ ആവിഷ്ക്കരിക്കും. ഇതിനായി സർക്കാർ രൂപീകരിക്കുന്ന അതോറിറ്റിയുടെ പ്രവർത്തനം ജനുവരി 26ന് ആരംഭിക്കും.

5. കുട്ടികളിലെ ആത്മഹത്യ പ്രവണത ചെറുക്കാൻ സ്കൂളുകളിൽ 1024 കൌൺസിലർമാർരെ കരാർ അടിസ്ഥാനത്തിൽ നിയമിക്കും. മാസത്തിൽ രണ്ടുതവണ ബ്ലോക്ക് അടിസ്ഥാനത്തിൽ രക്ഷിതാക്കൾക്കും കൌൺസിലിങ് നൽകും. സ്കൂളുകളിൽ 20 കുട്ടികൾക്ക് ഒരു അധ്യാപകൻ എന്ന ക്രമത്തിൽ നിരീക്ഷണവും ഏർപ്പെടുത്തും.

6. കുട്ടികളിലെ പോഷകാഹാര കുറവ് അഥവ വിളർച്ചയുള്ളവരെ കണ്ടെത്താനും അവർക്ക് മതിയായ പോഷകാഹാരം എത്തിക്കുന്നതിനുമുള്ള പദ്ദതി തുടങ്ങും. ഫെബ്രുവരി 15ന് ഉള്ളിൽ വിളർച്ചയുള്ള കുട്ടികളെ കണ്ടെത്തും.

7. പ്രകൃതി സൌഹാർദ വീടു നിർമ്മാണം പ്രോൽസാഹിപ്പിക്കും. ഇതിനായി ഒറ്റത്തവണയായി അടയ്ക്കുന്ന കെട്ടിട നികുതിയിൽ നിശ്ചിത ശതമാനം ഇളവ് നൽകും.

8. ഇന്‍റർനെറ്റിനെയും സാമൂഹിക മാധ്യമങ്ങളെയുംകുറിച്ച് അറിയാനും വ്യാജ പ്രചാരണങ്ങൾ തടയുന്നതിനും ഇന്‍റർനെറ്റ്, ഡിജിറ്റൽ മീഡിയാ സാക്ഷരത പരിപാടി നടപ്പാക്കും. സത്യമേവ ജയതേ എന്ന പേരിലുള്ള പരിലുള്ള പദ്ധതിയിൽ ഐടി നിയമങ്ങളെക്കുറിച്ചുള്ള ക്ലാസുകൾ ഉണ്ടാകും.

9. പ്രഭാത സായാഹ്ന സവാരിക്കും, കുട്ടികൾക്കു കളിക്കാനുമുള്ള പൊതു ഇടം ഫെബ്രുവരിയോടെ എല്ലാ വില്ലേജുകളിലും സജ്ജമാകും.

10. മടങ്ങിവരുന്ന പ്രവാസികൾക്ക് അവർ ജോലി ചെയ്തിരുന്ന സ്ഥാപനങ്ങളിൽനിന്നുള്ള ആനുകൂല്യങ്ങൾ ലഭിക്കുന്നതിന് സമർപ്പിക്കേണ്ട സർക്കാർ രേഖകൾ അപേക്ഷിച്ചു 15 ദിവസത്തിനകം നൽകുന്ന പദ്ധതിയും ഈ മാസം തുടങ്ങും.