പെരുമാറ്റച്ചട്ട ലംഘനം; കണ്ണൂർ മേയര്‍ക്കും കെ.കെ.രാഗേഷ് എംപിക്കും നോട്ടീസ്

കണ്ണൂരിൽ തെരഞ്ഞെടുപ്പ് പെരുമാറ്റച്ചട്ടങ്ങൾ കർശനമാക്കി ജില്ലാ കലക്ടർ. തെരഞ്ഞെടുപ്പ് പെരുമാറ്റചട്ടം ലംഘിച്ചെന്ന് പരാതിയിൽ ജില്ലാ കലക്ടർ ജില്ലയിലെ പ്രമുഖ ജനപ്രതിനിധികൾക്ക് നോട്ടീസ് അയച്ചു. കണ്ണൂർ മേയർ ടി ഒ മോഹനന്‍, കെ കെ രാഗേഷ് എംപി എന്നിവർ ഉൾപ്പെടെയുള്ള ജനപ്രതിനിധികൾക്ക് ആണ് ആണ് നോട്ടീസ് ലഭിച്ചത്.

രണ്ട് വ്യത്യസ്ത പരിപാടികളിൽ തെരഞ്ഞെടുപ്പ് ചട്ടലംഘനം ഉണ്ട് എന്ന് ചൂണ്ടിക്കാണിച്ചാണ് ജില്ലാ തിരഞ്ഞെടുപ്പ് ഓഫീസർ കൂടിയായ ടി വി സുഭാഷ് നോട്ടീസ് അയച്ചത്. മുണ്ടേരി ഗവ ഹയര്‍ സെക്കണ്ടറി സ്‌കൂള്‍ കെട്ടിട ഉദ്ഘാടനം നിര്‍വ്വഹിച്ചത് ചട്ട ലംഘനമാണ് എന്ന് ചൂണ്ടിക്കാണിച്ചാണ് കെ കെരാഗേഷ് എം പി ക്ക് നോട്ടീസ്.

ചടങ്ങിന്റെ വാർത്തയും ഫോട്ടോയും പത്രമാധ്യമങ്ങൾ പ്രസിദ്ധീകരിച്ചിരുന്നു. ജില്ലാ പഞ്ചായത്ത് പ്രസിഡണ്ട് പി പി ദിവ്യയും പരിപാടിയിൽ പങ്കെടുത്തിരുന്നു.

കോര്‍പ്പറേഷന്‍ പരിധിയിലെ ചിക്കന്‍ സ്റ്റാളുകളില്‍ നിന്നുള്ള മാലിന്യം മട്ടന്നൂര്‍ റെന്ററിങ്ങ് പ്ലാന്റിലേക്ക് ശേഖരിക്കുന്നതിനുള്ള വാഹനങ്ങളുടെ ഫളാഗ് ഓഫ് കര്‍മം നിർവഹിച്ചു എന്ന് ചൂണ്ടിക്കാണിച്ചാണ് മേയർ ടി ഒ മോഹനന് നോട്ടീസ് നൽകിയത്. പെരുമാറ്റച്ചട്ടം നിലനില്‍ക്കെ പരിപാടികള്‍ നടത്തി പത്രമാധ്യമങ്ങളിലൂടെ പ്രസിദ്ധീകരിച്ചുവെന്ന പരാതിയിലാണ് നടപടി. നോട്ടീസ് ലഭിച്ച ജനപ്രതിനിധികൾ രണ്ട് ദിവസത്തിനകം രേഖാമൂലം വിശദീകരണം നല്‍കണം

അതേസമയം ഒരു സ്വകാര്യ ചടങ്ങിൽ ആണ് താൻ പങ്കെടുത്തത് എന്നാണ് മേയർ ടി  ഒ മോഹനന്‍റെ വിശദീകരണം. പെരുമാറ്റച്ചട്ടം ലംഘിക്കാൻ യാതൊരു തരത്തിലും ഉദ്ദേശിച്ചിരുന്നില്ല. മാലിന്യനിർമാർജനത്തിന് പ്രവർത്തിക്കുന്ന ഒരു സ്വകാര്യ കമ്പനിയുടെ ചടങ്ങിലാണ് പങ്കെടുത്തതെന്നും മേയർ ടി ഒ മോഹൻ ന്യൂസ് 18 ന്നോട് പറഞ്ഞു.<span style="color: #333333; font-size: 1rem;">.</span>