കാളയ്ക്ക് അറിയില്ലല്ലോ... ടിക് ടോക്കാണെന്ന്; വീഡിയോ ചിത്രീകരണത്തിനിടെ യുവാവ് മുങ്ങിമരിച്ചു

ടിക് ടോക്കിൽ പോസ്റ്റ്‌ ചെയ്യുന്നതിനായി കുളത്തിൽ ജെല്ലിക്കെട്ട്‌ കാളയോടൊപ്പം വീഡിയോ ഷൂട്ട് ചെയ്യവെ യുവാവ് മുങ്ങി മരിച്ചു. കോയമ്പത്തൂർ ജില്ലയിൽ കരുമത്തംപെട്ടി രായർപാളയം സ്വദേശി പഴനിസ്വാമിയുടെ മകൻ വിഘ്‌നേശ്വരനാണ്‌ (23) മുങ്ങി മരിച്ചത്.

കരുമത്തംപെട്ടി ഗ്രാമത്തിലെ കുളത്തിൽ ഇവർ ജെല്ലിക്കെട്ട് കാളയോടൊപ്പം ടിക്‌ ടോക് വീഡിയോ എടുക്കുന്നതിനിടയിൽ കാള വിരണ്ടു. നിയന്ത്രണം വിട്ട് വിഘ്‌നേശ്വരൻ മുങ്ങിത്താഴ്‌ന്നു. സുഹൃത്തുക്കളും പരിസരവാസികളും രക്ഷിക്കാൻ ശ്രമിച്ചെങ്കിലും കഴിഞ്ഞില്ല. കോയമ്പത്തൂരിൽ നിന്ന്‌ അഗ്‌നിരക്ഷാസേനയെത്തിയാണ് മൃതദേഹം കണ്ടെടുത്തത്. മൃതദേഹം കോയമ്പത്തൂർ മെഡിക്കൽ കോളേജിൽ പോസ്റ്റ്‌മോർട്ടം നടത്തി ബന്ധുക്കൾക്ക് വിട്ടുകൊടുത്തു. പോലീസ് കേസെടുത്തു.

മൂന്ന് സു​ഹൃത്തുക്കൾക്കൊപ്പമാണ് വിഘ്നേശ്വർ വിഡിയോ ഷൂട്ട് ചെയ്തിരുന്നത്. ഭുവനേശ്വരൻ, പരമേശ്വരൻ, മാധവൻ എന്നീ സു​ഹൃത്തുക്കളാണ് ഒപ്പമുണ്ടായിരുന്നത്. കൈത്തറി തൊഴിലാളികളായ ഇവർ നാല് പേരും ജെല്ലിക്കെട്ട് കാളകൾക്കും കാളവണ്ടിമത്സരങ്ങളിൽ പങ്കെടുക്കുന്ന കാളകൾക്കും പരിശീലനം നൽകുന്നുണ്ട്‌.