വാറ്റുചാരായം സജീവം; കർശന നടപടിയുമായി പോലീസും എക്സൈസും

കണ്ണൂർ: ലോക്ക്ഡൗണിന്റെ ഭാഗമായി മദ്യശാലകൾ അടച്ചതോടെ കണ്ണൂർ ജില്ലയിൽ വീണ്ടും വാറ്റുചാരായം സജീവമായി. എന്നാൽ പൊലീസും എക്സൈസും പിടിമുറുക്കിയതോടെ പല വമ്പന്മാരും പിടിയിലകപ്പെട്ടു

മുഴക്കുന്ന് പോലീസ് സ്റ്റേഷൻ അതിർത്തിയിൽ വീടിനകത്ത് അനധികൃതമായി നാടൻ ചാരായം ഉണ്ടാക്കിയ രണ്ടുപേരെ പോലീസ് അകത്താക്കി. തില്ലങ്കേരി കാഞ്ഞിരാട് സ്വദേശികളായ എ. പ്രദീപ് (42) പി.കെ. അമൽ (24) എന്നിവരാണ് ഇന്ന് പിടിയിലായത്

മുഴക്കുന്ന് പോലീസ് സ്റ്റേഷന്‍ സബ്ബ് ഇന്‍സ്പെക്ടര്‍ ലതീഷ് സി.സി. യുടെ നേതൃത്വത്തിലെ പോലീസ് സംഘമാണ് പ്രതികളെ പിടിക്കൂടിയത്. മൂന്നു ലിറ്ററോളം നാടന്‍ ചാരായവും , അത് നിര്‍മ്മിക്കുന്നതിനുള്ള സാമഗ്രികളും പ്രതികളുടെ കൈയ്യില്‍ നിന്നും പോലീസ് കണ്ടെടുത്തു. കേരള അബ്കാരി ആക്ട് 55(b), 55(g) എന്നീ വകുപ്പുകൾ പ്രകാരമാണ് കേസ് രജിസ്റ്റർ ചെയ്തത്

സീനിയര്‍ സിവില്‍ പോലീസ് ഓഫീസര്‍ സുമേഷ്, സി.പി.ഒ. പ്രമോദ്, സിന്ധു, സുഷിര്‍ എന്നിവരും നാടന്‍ ചാരായം പിടിച്ചെടുത്ത സംഘത്തില്‍ ഉണ്ടായിരുന്നു. പാനൂരിൽ രണ്ടുദിവസം മുമ്പ് ചാരായം ഉണ്ടാക്കുന്നതിനു വേണ്ടി സൂക്ഷിച്ചിരുന്ന 100 ലിറ്റർ വാഷാണ് എക്സൈസ് സംഘം പിടികൂടി നശിപ്പിച്ചത്

കഴിഞ്ഞ ദിവസം വേക്കളം കണ്ണുംപള്ളിൽ നാടൻ ചാരായം വിൽക്കാൻ ശ്രമിച്ച രണ്ട് യുവാക്കളെ പോലീസ് പിടികൂടിയിരുന്നു. കോളയാട് സ്വദേശി ഷിജിത്ത് (39), ബേക്കൽ സ്വദേശി സുജിത്ത് (30) എന്നിവരാണ് പിടിയിലായത്. പേരാവൂര്‍ സബ്ബ് ഇന്‍സ്പെക്ടര്‍ കൃഷ്ണന്‍, സിവില്‍ പോലീസ് ഓഫീസര്‍ വാസു, വിജേഷ് എന്നിവരടങ്ങിയ സംഘമാണ് പ്രതികളെ വലയിലാക്കിയത്

കോവിഡ് 19 പടരുന്നതിനെതിരെ സർക്കാർ പുറപ്പെടുവിച്ച നിര്‍ദ്ദേശങ്ങള്‍ ധിക്കരിച്ച് ജീവന് അപായപ്പെടുന്നതിനും പകർച്ചവ്യാധി വ്യാപിക്കുന്നതിനും ഇടയാക്കുന്ന തരത്തിലും പ്രവർത്തിച്ചതിനും അബ്കാരി ആക്ട് പ്രകാരവും കേസ്സ് റജിസ്റ്റര്‍ ചെയ്തു. പ്രതികളുടെ ബൈക്കും പോലീസ് കസ്റ്റഡിയില്‍ എടുത്തിട്ടുണ്ട്

കഴിഞ്ഞ ഏപ്രിൽ ആറിന് ആറളം ഫാം പുനരധിവാസ മേഖലയിൽ നടത്തിയ പരിശോധനയിൽ വാറ്റുപകരണങ്ങളും വാഷും പോലീസ് കണ്ടെടുത്തിരുന്നു. സംഭവത്തിൽ പ്രദേശത്തുള്ള ഉള്ള കുട്ടപ്പനെ (55) പോലീസ് പിടികൂടി കോടതിയിൽ ഹാജരാക്കിയിരുന്നു. ആറളം ഇന്‍സ്പെക്ടര്‍ സുധീർ കല്ലന്‍റെ നേതൃത്വത്തില്‍ നടത്തിയ അബ്കാരി റെയ്ഡിൽ സിവില്‍ പോലീസ് ഓഫീസര്‍മാരായ കെ.എം. ശ്രീജിത്ത്, ഷറഫുദ്ദീൻ, നിപ്പു ജോസഫ് എന്നിവർ പങ്കെടുത്തു