കൊറോണ: ചൈനയിൽ കുടുങ്ങിയ 15 മലയാളി വിദ്യാർത്ഥികൾ തിരിച്ചെത്തി

കൊച്ചി: കൊറോണ വൈറസ് ഭീതിയെത്തുടർന്ന് ചൈനയില്‍ കുടുങ്ങിയ 15 മലയാളി വിദ്യാര്‍ഥികള്‍ നാട്ടിലെത്തി. കളമശ്ശേരി മെഡിക്കൽ കോളജിലെത്തിച്ച് ഇവരെ പരിശോധിച്ചു. പ്രാഥമിക പരിശോധനയിൽ വൈറസ് ലക്ഷണങ്ങൾ ഇല്ലാത്തതിനാൽ വിദ്യാർത്ഥികളെ വീടുകളിലേക്ക് അയച്ചു.

ആശങ്കകൾക്കും അനിശ്ചിതത്വത്തിനുമൊടുവിലാണ് മലയാളി വിദ്യാർത്ഥികളുടെ 15 അംഗ സംഘം കൊച്ചിയിലെത്തിയത്. എയർ ഏഷ്യയുടെ വിമാനത്തിൽ രാത്രി 11.15 നാണ് വിദ്യാർത്ഥികൾ നെടുമ്പാശ്ശേരിയിൽ എത്തിയത്.

വിവാനത്താവളത്തിലെ മെഡിക്കൽ സംഘത്തിന്റെ പ്രാഥമിക പരിശോധനകൾക്ക് ശേഷം അഞ്ച് ആംബലൻസുകളിലായി ഇവരെ കളമശ്ശേരി മെഡിക്കൽ കോളേജിലേക്ക് മാറ്റി. ഡോക്ടർമാരുടെ സംഘം മെഡിക്കൽ കോളേജിലെ പരിശോധനയിലും രോഗലക്ഷണങ്ങൾ കണ്ടില്ല. തുടർന്ന് രക്തം പരിശോധനക്ക് ശേഖരിച്ചു. അസ്വഭാവികമായി ഒന്നും റിപ്പോർട്ട് ചെയ്യാത്തതിനാൽ ഇവരെ വീടുകളിലേക്ക് അയയ്ക്കുകയായിരുന്നു.

ചൈനയിലെ യുനാൻ പ്രവിശ്യയിലെ ദാലി സർവകലാശാലയിൽ മെഡിക്കൽ വിദ്യാർഥികളായ ഇവരുടെ സിംഗപ്പൂര്‍ വഴിയുള്ള വിമാനടിക്കറ്റുകള്‍ അസാധുവായതിനെത്തുടർന്നാണ് യാത്ര അനിശ്ചിതത്വത്തിലായത്.

തുടർന്ന് കേന്ദ്ര സർക്കാർ ഇടപെടലിനെത്തുടർന്നാണ് യാത്ര സാധ്യമായത്. യാത്രയ്ക്കുള്ള പണം സ്വയം കണ്ടെത്തേണ്ടി വന്നതായി വിദ്യാർത്ഥികളുടെ ബന്ധുക്കൾ പറഞ്ഞു.

ആകെ 21 വിദ്യാർത്ഥികളാണ് സംഘത്തിലുണ്ടായിരുന്നത്. നെടുമ്പാശ്ശേരിയിലെത്തിയ 15 പേരെ കൂടാതെ 2 തമിഴ്നാട് സ്വദേശികളും തിരിച്ചെത്തിയിട്ടുണ്ട്.

എന്നാൽ യാത്ര അനിശ്ചിതത്വത്തിലായതിനെത്തുടർന്ന് 4 പേർ സ്വന്തം നിലയ്ക്ക് പുറപ്പെടാൻ ശ്രമിച്ചെങ്കിലും പിന്നീട് അവരെക്കുറിച്ച് വിവരം ലഭ്യമായിട്ടില്ല.