'രാവിലെയെന്തിന് നടക്കാനിറങ്ങി? കാട്ടാന ചവിട്ടിക്കൊന്നതിലെ പ്രതികരണം;വനംവകുപ്പ് ഉദ്യോഗസ്ഥർക്കെതിരെ നടപടി ആവശ്യപ്പെട്ട് CPM ഹർത്താൽ

പാലക്കാട്: രാവിലെ നടക്കാനിറങ്ങിയ നാട്ടുകാരനെ കാട്ടാന ചവിട്ടിക്കൊന്ന സംഭവത്തിൽ വനംവകുപ്പ് ഉദ്യോഗസ്ഥരുടെ ഭാഗത്തു നിന്നുണ്ടായ പ്രതികരണത്തിനെതിരെ നാട്ടുകാർ രംഗത്ത്. പയറ്റാം കുന്നം സ്വദേശി ശിവരാമനാണ് പ്രഭാത സവാരിക്കിടെ കാട്ടാനയുടെ ചവിട്ടേറ്റ് മരിച്ചത്. അപകട വിവരം അറിയിച്ചപ്പോൾ 'എന്തിന് നടക്കാൻ ഇറങ്ങി 'യെന്ന പ്രതികരണമാണ് ഉദ്യോഗസ്ഥരിൽ നിന്ന് ഉണ്ടായതെന്ന് നാട്ടുകാർ പറയുന്നു.

ഉദ്യോഗസ്ഥനെതിരെ നടപടി ആവശ്യപ്പട്ട് പ്രദേശത്ത് സിപിഎം ഇന്ന് ഹർത്താൽ പ്രഖ്യാപിച്ചിരിക്കുകയാണ്. കത്തേത്തറ, പുതുപ്പരിയാരം പഞ്ചായത്തുകളിലാണ് ഹർത്താൽ.

വന്യമൃഗ ശല്യം തടയണമെന്നും എന്തിന് പ്രഭാത നടത്തത്തിനിറങ്ങിയെന്ന് പറഞ്ഞ ഉദ്യോഗസ്ഥനെതിരെ നടപടിയും ആവശ്യപ്പെട്ട് സിപിഎം പാലക്കാട് ഡിഎഫ്ഒ ഓഫീസ് ഉപരോധിയ്ക്കുകയാണ്.

പാലക്കാട് ധോണിയിലാണ് പ്രഭാത നടത്തത്തിനിറങ്ങിയയാളെ കാട്ടാന ചവിട്ടിക്കൊന്നത്. ധോണി സ്വദേശി ശിവരാമനാണ് കൊല്ലപ്പെട്ടത്. ഇന്ന് പുലർച്ചെ അഞ്ച് പതിനഞ്ചോടെയാണ് സംഭവം.‌‌

സുഹൃത്തുക്കൾക്കൊപ്പം ഒലവക്കോട് ധോണി റോഡിൽ നടക്കാനിറങ്ങിയതാണ് ശിവരാമൻ. പയറ്റാംകുന്നിന് സമീപമെത്തിയപ്പോൾ കാട്ടാനയുടെ മുന്നിൽ അകപ്പെടുകയായിരുന്നു. രക്ഷപ്പെടാനായി തൊട്ടടുത്ത പാടത്തേക്കിറങ്ങിയെങ്കിലും കാട്ടാന പിന്തുടർന്നെത്തി ചവിട്ടി കൊന്നു. മൃതദേഹം പോസ്റ്റ്മോമോർട്ടത്തിനായി ജില്ലാ ആശുപത്രിയിലേക്ക് മാറ്റി.