മണല്‍മാഫിയയ്‌ക്കെതിരെ ഒറ്റയാള്‍പോരാട്ടം നടത്തിയ ഡാളി ഇനി ഓര്‍മ്മ

നെയ്യാർ മണൽ ഖനനത്തിനെതിരെ ഒറ്റയാൾ പോരാട്ടം നടത്തിയ ഡാളിയമ്മൂമ്മ അന്തരിച്ചു. 90 വയസ്സായിരുന്നു. ജില്ലാ പഞ്ചായത്തിന്റെ അണ്ടൂർക്കോണത്തെ വയോജന കേന്ദ്രത്തിൽ വച്ചായിരുന്നു അന്ത്യം. കൈയ്യിൽ വെട്ടുകത്തിയുമായി നെയ്യാറിലെ മണൽമാഫിയക്കെതിരെ ഡാളിയമ്മൂമ്മ ഒറ്റക്ക് നടത്തിയത് വേറിട്ട അസാധാരണ പോരാട്ടമായിരുന്നു.

ഓലത്താന്നിയില്‍ നെയ്യാറിന്റെ തീരത്ത് ഒറ്റയ്ക്ക് താമസിച്ചിരുന്ന ഡാളി മണല്‍മാഫിയകളുടെ ഭീഷണിയെ ഒറ്റയാള്‍ പോരാട്ടം നടത്തി അതിജീവിച്ചാണ് ശ്രദ്ധേയയായത്.

ചുറ്റുപാടുള്ള സ്ഥലങ്ങളെല്ലാം വെള്ളത്തിനടിയിലായിട്ടും ഒറ്റത്തുരുത്തിലെ വീട്ടിൽ ഏകയായി ധൈര്യത്തോടെ നിലകൊണ്ടു ഡാളി ഐക്യദാർഡ്യവുമായി സിനിമാതാരങ്ങളടക്കം നേരിട്ടെത്തിയിരുന്നു.

കഴിഞ്ഞ പ്രളയകാലത്ത് നെയ്യാര്‍ നിറഞ്ഞൊഴുകിയതോടെ, താല്‍ക്കാലിക പാലവും തകര്‍ന്നതോടെയാണ് ഇവര്‍ വീട് ഉപേക്ഷിച്ചത്. വീട്ടിലേക്കു കയറാനാകാതെയായതോടെ കടത്തിണ്ണ.

ഒരാഴ്ചയായി ഭക്ഷണമില്ലാതെ കഴിഞ്ഞ ഡാളിയമ്മയെക്കുറിച്ച് ജില്ലാപ്പഞ്ചായത്തിന് പരാതി ലഭിച്ചു. തുടര്‍ന്ന് ജില്ലാപ്പഞ്ചായത്ത് സ്ഥിരംസമിതി അധ്യക്ഷ വി.ആര്‍. സലൂജ കാട്ടാക്കടയിലെ വീട്ടിലെത്തി ഡാളിയമ്മയെ അഗതിമന്ദിരത്തിലേക്ക് മാറ്റുകയായിരുന്നു.