'കാരുണ്യ' പ്രതിസന്ധി നീങ്ങി: പദ്ധതി നിർത്തലാക്കാനുള്ള തീരുമാനം സ്വകാര്യ ആശുപത്രികൾ ഉപേക്ഷിച്ചു

കൊച്ചി: കാരുണ്യ ആരോഗ്യ സുരക്ഷ പദ്ധതിയുമായി ബന്ധപ്പെട്ട് നിലനിന്നിരുന്ന പ്രതിസന്ധി നീങ്ങി. സ്വകാര്യ ആശുപത്രികൾക്ക് നൽകേണ്ടിയിരുന്ന കുടിശിഖ തുക സർക്കാർ നൽകിത്തുങ്ങി. ഇതോടെ പദ്ധതി നിർത്തലാക്കാനുള്ള തീരുമാനം സ്വകാര്യ ആശുപത്രികൾ ഉപേക്ഷിച്ചു.

കാരുണ്യ ആരോഗ്യ സുരക്ഷ പദ്ധതി പ്രകാരം 50 കോടി രൂപയാണ് ചികിത്സിച്ച തുകയായി സ്വകാര്യ ആശുപത്രികൾക്ക് ലഭിയ്ക്കേണ്ടിയിരുന്നത്. തുകയുടെ 40 ശതമാനം സംസ്ഥാന സർക്കാരും 60 ശതമാനം കേന്ദ്ര സർക്കാരുമാണ് അനുവദിയ്ക്കേണ്ടിയിരുന്നത്.

എന്നാൽ സംസ്ഥാന സർക്കാർ തുക അനുവദിയ്ക്കാത്തതിനെത്തുടർന്ന് ഇൻഷ്വറൻസ് കമ്പനി സ്വകാര്യ ആശുപത്രികൾക്ക് പണം നൽകിയിരുന്നില്ല. പ്രതിസസന്ധി രൂക്ഷമായതിനെത്തുടർന്ന് ഡിസംബർ ഒന്ന് മുതൽ പദ്ധതി നടപ്പാക്കുന്നത് നിർത്തിവെയ്ക്കാൻ സ്വകാര്യ ഹോസ്പിറ്റലുകൾ തീരുമാനിച്ചിരുന്നു.

ഇതിനെത്തുടർന്നാണ് സർക്കാർ തുക അനുവദിച്ചത്. 20 കോടിയോളം രൂപ ഇൻഷ്വറൻസ് കമ്പനിയ്ക്ക് സർക്കാർ കൈമാറി. ബാക്കി തുക ഡിസംബർ 31-നകം കൈമാറാമെന്നും സർക്കാർ ഉറപ്പ് നൽകിയിട്ടുണ്ട്.

ഈ സാഹചര്യത്തിൽ പദ്ധതി നടപ്പാക്കുന്നത് തുടരുമെന്ന് കേരള പ്രൈവറ്റ് ഹോസ്പിറ്റൽ അസോസിയേഷൻ അറിയിച്ചു. കെപിഎച്ച്എയുടെ കീഴിലുള്ള 194 ഹോസ്പിറ്റലുകളാണ് പദ്ധതിയിൽ നിന്ന് പിൻമാറുമെന്ന് പ്രഖ്യാപിച്ചിരുന്നത്