അസ്മിയയുടെ ദുരൂഹ മരണം: ബാലരാമപുരത്തെ മതപഠനശാലയിലേക്ക് DYFI മാർച്ച്

തിരുവനന്തപുരം: ബാലരാമപുരത്ത് മതപഠനശാലയിലെ 17കാരി മരണപ്പെട്ട സംഭവത്തിൽ ഡിവൈഎഫ്ഐ പ്രതിഷേധ മാർച്ച് നടത്തി. ബാലരാമപുരം അൽ അമീൻ മത വിദ്യഭ്യാസ സ്ഥാപത്തിലേക്കായിരുന്നു ഡിവൈഎഫ്ഐ മാർച്ച്. തിരുവനന്തപുരം ജില്ലാ കമ്മിറ്റി നടത്തിയ പ്രതിഷേധ മാർച്ച് ജില്ലാ സെക്രട്ടറി ഡോ. ഷിജുഖാൻ ഉദ്ഘാടനം ചെയ്തു.

സംഭവത്തില്‍ ഡിവൈഎഫ്ഐ പ്രതികരിക്കാത്തതിനും പ്രതിഷേധിക്കാത്തതിനും സോഷ്യൽ മീഡിയയിൽ അടക്കം വിമർശനം ഉയർന്നിരുന്നു ഇതിന് പിന്നാലെയാണ് ഡിവൈഎഫ്ഐ പ്രതിഷേധ മാർച്ച് സംഘടിപ്പിച്ചത്.

അസ്മിയയുടെ മരണത്തിൽ ഡിവൈഎഫ് സമഗ്ര അന്വേഷണം ആവശ്യപ്പെട്ടിരുന്നു. വിദ്യാര്‍ഥിനിയുടെ മരണം ഞെട്ടലുളവാക്കുന്നതാണെന്നും കുടുംബം ഉന്നയിച്ച ആരോപണങ്ങളിൽ പോലീസ് സമഗ്ര അന്വേഷണം നടത്തി നിജസ്ഥിതി പുറത്തു കൊണ്ടുവരണമെന്നും ഡിവൈഎഫ്ഐ ഫേസ്ബുക്കിൽ പങ്കുവെച്ച കുറിപ്പില്‍ ആവശ്യപ്പെട്ടു.

കുട്ടികൾ താമസിച്ചു പഠിക്കുന്ന സ്ഥാപനങ്ങളിൽ കൂടുതൽ സുരക്ഷ ഉറപ്പുവരുത്താൻ അധികൃതർ നടപടി സ്വീകരിക്കണമെന്ന് ഡിവൈഎഫ്ഐ കുറിപ്പിൽ പറഞ്ഞിരുന്നു.

17കാരിയുടെ മരണം അന്വേഷിക്കാൻ‌ 13അംഗ സംഘത്തെ നിയോഗിച്ചതായി പൊലീസ്. നെയ്യാറ്റിൻകര എഎസ്പിയുടെ മേൽ‌നോട്ടത്തിലാണ് അന്വേഷണം. പെൺകുട്ടിയുടെ അമ്മയിൽ നിന്നും സഹപാഠികളിൽ നിന്നും പൊലീസ് മൊഴിയെടുക്കും. അസ്മിയയുടെ മരണം ആത്മഹത്യയെന്നാണ് പ്രാഥമിക പോസ്റ്റുമോര്‍ട്ടം റിപ്പോര്‍ട്ട്.

അതേസമയം അസ്മിയയുടെ മരണത്തിൽ പ്രതിഷേധം ശക്തമാക്കിയിരിക്കുകയാണ് ബിജെപിയും എബിവിപിയും. അസ്മിയയുടെ മരണത്തിൽ സമഗ്ര അന്വേഷണം ആവശ്യപ്പെട്ടാണ് ബി ജെ പിയും എ ബി വി പിയും പ്രതിഷേധം സംഘടിപ്പിച്ചത്.