പാലക്കാട് പടക്ക നിർമാണ സാമഗ്രികൾ സൂക്ഷിച്ചിരുന്ന വീട്ടിൽ സ്ഫോടനം: മൃതദേഹാവശിഷ്ടങ്ങള്‍ കണ്ടെത്തി?

പാലക്കാട്: പാലക്കാട് കേരളശ്ശേരിയില്‍ പടക്ക നിർമാണ സാമഗ്രികൾ സൂക്ഷിച്ചിരുന്ന വീട്ടിൽ സ്ഫോടനം. കേരളശ്ശേരി കാവിൽ അബ്ദുള്‍ റസാഖ് എന്നയാളുടെ വീടിനോട് ചേര്‍ന്ന് പടക്കനിര്‍മ്മാണ സാമഗ്രികള്‍ സൂക്ഷിച്ച ചായ്പിലാണ് പൊട്ടിത്തെറിയുണ്ടായത്.

സ്ഫോടനത്തിൽ ശരീരാവശിഷ്ടങ്ങൾ കണ്ടെത്തി. എന്നാൽ ഇതാരുടേതാണെന്ന് സ്ഥിരീകരിച്ചിട്ടില്ല. വീട്ടുടമയെ കാണാനില്ലെന്ന് പൊലീസ് പറയുന്നു

രാവിലെ 11 മണിയോടെയാണ് സ്‌ഫോടനമുണ്ടായത്. ഗ്യാസ് സിലിണ്ടര്‍ പൊട്ടിത്തെറിച്ചതാണെന്നാണ് സമീപവാസികള്‍ ആദ്യം കരുതിയത്.

സ്ഥലത്തെത്തിയപ്പോഴാണ് പടക്കനിര്‍മ്മാണത്തിനുള്ള സാമഗ്രികള്‍ സൂക്ഷിച്ച സ്ഥാലത്താണ് സ്‌ഫോടനം നടന്നതെന്ന് വ്യക്തമായത്.

പടക്കനിര്‍മ്മാണ സമയത്ത് റസാഖ് വീട്ടിലുണ്ടായിരുന്നതായാണ് വിവരം. ഇദ്ദേഹത്തിന്റെ ഭാര്യ സമീപത്തുള്ള വീട്ടിലായിരുന്നുവെന്ന് കണ്ടെത്തി.

സ്‌ഫോടനത്തിന് ശേഷം വീട്ടുടമ റസാഖിനെ കാണാനില്ലെന്ന് നാട്ടുകാര്‍ സൂചിപ്പിച്ചു. പൊലീസും ഫോറന്‍സിക് സംഘവും സംഭവസ്ഥലത്തെത്തി തെളിവുകള്‍ ശേഖരിച്ചു. അന്വേഷണം പുരോഗമിക്കുകയാണ്.