Gold Smuggling | കോവിഡ് കാലത്ത് സ്വർണം കടത്താനും മാസ്ക് ; മാസ്കിനുള്ളിൽ സ്വർണം കടത്താൻ ശ്രമിച്ചയാൾ കരിപ്പൂരിൽ പിടിയിൽ

മലപ്പുറം: സ്വർണം കടത്താൻ നൂതനവും ആരും ചിന്തിക്കാത്തതുമായ അനവധി മാർഗങ്ങൾ കള്ളക്കടത്തുകാർ കണ്ടെത്തുന്നുണ്ട്. പാന്റിലെ അരക്കെട്ടിൽ പ്രത്യേക അറ ഉണ്ടാക്കിയും ഷൂസിന് ഉള്ളിൽ ഒളിപ്പിച്ചും ഒക്കെ സ്വർണം കടത്താൻ ശ്രമിച്ച് പിടിയിലായവർ അനവധി ആണ്.

കോവിഡ് സാഹചര്യം ദുരുപയോഗം ചെയ്ത് സ്വർണക്കള്ളക്കടത്തുകാർ പുത്തൻരീതികൾ പരീക്ഷിക്കുകയാണ്. മാസ്കിൽ ഒളിപ്പിച്ചാണ് കരിപ്പൂർ വിമാനത്താവളത്തിലൂടെ ഒരാൾ സ്വർണം കടത്താൻ ശ്രമിച്ചത്. യുഎഇയിൽ നിന്നും വിമാനമിറങ്ങിയ കർണാടകയിലെ ഭട്കൽ സ്വദേശി അമ്മർ ആണ് സ്വർണം മാസ്കിനുള്ളിൽ കടത്താൻ ശ്രമിച്ചത്.

എയർപോർട്ട് ഇന്റലിജൻസ് യൂണിറ്റാണ് ഇയാളെ പിടികൂടിയത്. 40 ഗ്രാം സ്വർണം മാസ്കിലെ ശ്വാസദ്വാരത്തിലാണ് ഇയാൾ ഒളിപ്പിച്ചത്. സ്വർണത്തിന് വിപണിയിൽ രണ്ടുലക്ഷം രൂപ വില വരും.

പല മാർഗങ്ങളിലൂടെയും പലരും സ്വർണം കടത്താൻ ശ്രമിച്ചിട്ടുണ്ടെങ്കിലും മാസ്കിൽ കടത്താൻ ശ്രമിച്ച സ്വർണം പിടികൂടുന്നത് കരിപ്പൂരിൽ ഇതാദ്യമാണ്. മുൻപ് ഫാൻസി റിബണിലും കുക്കറിനുള്ളിലും അഡാപ്റ്ററിലും മിക്സി മോട്ടോറിലും ഒക്കെ സ്വർണം കടത്താൻ ശ്രമിച്ച പലരും പിടിയിലായിരുന്നു.