ഒടുവിൽ പാലാരിവട്ടത്തെ മരണക്കുഴി അടഞ്ഞു; ഒരു ദിവസം നീണ്ട പ്രതിഷേധത്തിന് ശേഷം

ഒരാളുടെ മരണവും ഒരു ദിവസം നീണ്ടു നിന്ന പ്രതിഷേധവും വേണ്ടി വന്നു  പാലാരിവട്ടത്തെ കുഴിയിൽ  മണ്ണ് വീഴാൻ. കുഴി അടയ്ക്കാനായി റോഡ് വെട്ടിപ്പൊളിക്കാൻ  പി.ഡബ്ല്യു ഡി യുടെ അനുമതി കാത്തിരിക്കുകയായിരുന്നു കഴിഞ്ഞ ഒരു മാസമായി ജലസേചന വകുപ്പ്.

യുവാവ് കുഴിയിൽ വീണ് മരിക്കും വരെ പൊതുമരാമത്ത് വകുപ്പ്  കുഴി അടയ്ക്കാൻ അനുമതി നൽകിയില്ല. ഇന്നലെ ജില്ലാ കളക്ടർ പ്രത്യേക അധികാരം ഉപയോഗിച്ച് കുഴി അടയ്ക്കാൻ ജലസേചന വകുപ്പിന് അനുവാദം നൽകി.

കളക്ടറുടെ അനുമതിയുമായി കുഴി അടയ്ക്കാനെത്തിയപ്പോൾ രാത്രി ജനകീയ പ്രക്ഷോഭം ആരോപിച്ചു. സമരക്കാരെ നീക്കം ചെയ്ത ശേഷം അർധരാത്രിയോടെയാണ് കുഴി അടയ്ക്കാനുള്ള ശ്രമം ആരംഭിച്ചത്.

കുഴിയിലെ ഉറവയിൽ നിന്ന് വരുന്ന വെള്ളം പമ്പ് ചെയ്ത് നീക്കിയ ശേഷം ഇന്ന് രാവിലെ എം -സാന്റും മെറ്റൽ - സിമൻറ് മിശ്രിതവും ചേർത്ത് കുഴി അടച്ചു. നാളെ ഇതിന് മുകളിൽ ടാറിങ്ങ് നടത്തും. അതു വരെ വാഹനങ്ങൾ കയറാതെ പൊലീസ് സംരക്ഷിക്കും.

പാലാരിവട്ടത്ത് കുഴിയിൽ വീണ് യുവാവ് മരിച്ച സ്ഥലത്തു നിന്ന് നൂറ് മീറ്റർ അകലെ റോഡിന് എതിർവശവും ഇതുപോലെ മറ്റൊരു കുഴി രൂപപ്പെട്ട് വരുകയാണ്. പൊലീസ് എത്തി ഇവിടെ അപായസൂചന ബോർഡ് സ്ഥാപിച്ചു കഴിഞ്ഞു. അപകടമുണ്ടായ സ്ഥലത്തും ഒരു മാസം മുൻപ് രൂപപ്പെട്ട ചെറിയ കുഴിയാണ് വലിയ ഗർത്തമായി മാറിയത്.