തിരുവനന്തപുരം വഴുതക്കാട് അക്വേറിയത്തിൽ വൻതീപിടിത്തം; മൂന്നുപേരെ രക്ഷപ്പെടുത്തി

തിരുവനന്തപുരം: വഴുതക്കാട് ആകാശവാണി ഓഫീസിന് സമീപം അക്വേറിയത്തിൽ വൻ തീപിടിത്തം.  അക്വേറിയം കട പൂർണമായി കത്തി നശിച്ചു. സമീപത്തെ മൂന്ന് വീടുകളിലേക്കും തീപടർന്നു. 4 യൂണിറ്റ് അഗ്നിശമനസേന സ്ഥലത്തെത്തി തീ അണയ്ക്കുന്നുണ്ട്. വലിയ പുകച്ചുരുളുകൾ പ്രദേശത്ത് നിറഞ്ഞു.

എംപി അപ്പൻ റോഡിൽ 30 വർഷമായി പ്രവർത്തിക്കുന്ന അക്വേറിയം കടയ്ക്കാണ്  തീപിടിച്ചത്. വൈകിട്ട് നാലു മണിയോടെയാണ് സംഭവം. ഇവിടെനിന്നാണ് നഗരത്തിലെ വിവിധ കടകളിലേക്ക് അക്വേറിയവും മീനും വിതരണം ചെയ്തിരുന്നത്. ഗോഡൗണിൽ അക്വേറിയം നിർമാണത്തിനാവശ്യമായ സാധന സാമഗ്രികൾ സൂക്ഷിച്ചിരുന്നു. ചില വെൽഡിങ് ജോലികൾ സ്ഥലത്ത് നടന്നിരുന്നതായി സൂചനയുണ്ട്. സംഭവം നടക്കുമ്പോൾ 5 ജീവനക്കാർ കടയിലുണ്ടായിരുന്നു. അവരെല്ലാം പുറത്തുചാടി രക്ഷപ്പെട്ടു.

ഫൈബറും ഗ്ലാസുമെല്ലാം കടയിലുണ്ടായിരുന്നു. പിൻവശത്തെ ഷീറ്റിട്ടു മറച്ച സ്ഥലം തകർത്ത് അകത്തേക്ക് വെള്ളം ഒഴിച്ച് തീ കെടുത്താനുള്ള ശ്രമം തുടരുകയാണ്. വീടിന്റെ ഷീറ്റിലേക്കു തീ പടർന്നെങ്കിലും അധികം കത്തിയില്ല. ഓട്ടോറിക്ഷയ്ക്കു പോകാൻ കഴിയുന്ന വീതിയേ വഴിക്കുള്ളൂ. ഡ്രെയ്നേജിന്റെ പണി നടക്കുന്നതിനാല്‍ ഫയർഫോഴ്സിനു വരാൻ തടസമുണ്ടായി

വലിയ പുകച്ചുരുളുകൾ ഉയർന്നതോടെ സമീപവാസികൾ ഫയർഫോഴ്സിനെ വിവരം അറിയിച്ചു. തൊട്ടടുത്തെല്ലാം വീടുകളുണ്ട്. കനത്ത ചൂടായതിനാൽ തീ അടുത്തുള്ള വീടുകളിലേക്കും പടരുകയായിരുന്നു. ഫയർഫോഴ്സും പൊലീസും ആദ്യം അടുത്തുള്ള വീട്ടുകാരെ ഒഴിപ്പിച്ചു. തീ മറ്റു വീടുകളിലേക്ക് പടരാതിരിക്കാൻ ഫയർഫോഴ്സ് മുൻകരുതലെടുത്തു.

പഴയ വീട്ടിനോട് ചേർന്നാണ് അക്വേറിയം പ്രവർത്തിച്ചിരുന്നത്. എങ്ങനെയാണ് തീ പടർന്നു പിടിച്ചതെന്ന് സംബന്ധിച്ച് വ്യക്തത വന്നിട്ടില്ല. ആദ്യം ചവറുകത്തിക്കുന്നതു പോലെയാണ് തോന്നിയതെന്ന് ദൃക്‌സാക്ഷികൾ പറഞ്ഞു. വളരെ പെട്ടെന്ന് കത്തിപ്പടരുകയായിരുന്നു. വീടിന്റെ ഓടുകളെല്ലാം കത്തിയമർന്നു. 

അക്വേറിയം കടയിൽ വെൽഡിങ് പ്രവർത്തനം നടക്കുകയായിരുന്നു. വെൽഡിങ് ഉപകരണത്തിൽനിന്നുള്ള തീപൊരിയാണ് തീപിടിത്തതിന് ഇടയാക്കിയതെന്നാണ് പ്രാഥമിക നിഗമനം