Glass Bridge | ടൂറിസം വകുപ്പിന് കീഴിലെ കേരളത്തിലെ ആദ്യ ഗ്ലാസ് ബ്രിഡ്ജ് വരുന്നു

കേരളത്തിലെ വിനോദസഞ്ചാര മേഖലയില്‍ ഏറെ ശ്രദ്ധിക്കപ്പെട്ടവയാണ് ഗ്ലാസ് ബ്രിഡ്ജുകള്‍. വയനാട്ടിലെ 900 കണ്ടിയില്‍ സ്ഥാപിച്ചിട്ടുള്ള കണ്ണാടി പാലം വിനോദസഞ്ചാരികള്‍ക്ക് ഒരു നവ്യാനുഭവമായിരുന്നു. ഇപ്പോഴിതാ സംസ്ഥാന ടൂറിസം വകുപ്പിന് കീഴിലെ കേരളത്തിലെ ആദ്യത്തെ ഗ്ലാസ് ബ്രിഡ്ജ് പ്രഖ്യാപിച്ചിരിക്കുകയാണ് മന്ത്രി മുഹമ്മദ് റിയാസ്.

തിരുവനന്തപുരം ജില്ലയിലെ സാഹസിക വിനോദ സഞ്ചാര കേന്ദ്രമായ ആക്കുളം ടൂറിസ്റ്റ് വില്ലേജിലാണ് ഗ്ലാസ് ബ്രിഡ്ജ് ആരംഭിക്കാൻ പോകുന്നത്. ഇതിൻ്റെ പ്രാരംഭ പ്രവർത്തനങ്ങൾ ആരംഭിച്ചു കഴിഞ്ഞെന്ന് മന്ത്രി പറഞ്ഞു.

2022 നവംബറിലാണ് ആക്കുളം സാഹസിക വിനോദ സഞ്ചാര പദ്ധതിയുടെ ഒന്നാം ഘട്ടം ഉദ്ഘാടനം ചെയ്തത്. ഇപ്പോൾ തിരുവനന്തപുരത്ത് എത്തുന്ന സഞ്ചാരികളുടെ പ്രധാന ഇടമായി ആക്കുളം മാറിക്കഴിഞ്ഞു. ആറ് മാസത്തിനുള്ളിൽ തന്നെ ടൂറിസ്റ്റ് വില്ലേജിൽ ഒന്നേകാൽ ലക്ഷത്തോളം സഞ്ചാരികൾ സന്ദർശിക്കുകയും ഒരു കോടിയിൽ അധികം വരുമാനം ഉണ്ടാവുകയും ചെയ്തിട്ടുണ്ട്.

സാഹസിക വിനോദ സഞ്ചാര പദ്ധതിയുടെ രണ്ടാം ഘട്ടം ഉടൻ തന്നെ ആരംഭിക്കുമെന്ന് ഉദ്ഘാടന സമയത്ത് സൂചിപ്പിച്ചിരുന്നു.രണ്ടാം ഘട്ട പദ്ധതികളുടെ ഭാഗമായാണ് ഗ്ലാസ് ബ്രിഡ്ജ് വരുന്നത്. 

അതോടൊപ്പം ടോയ് ട്രെയിൻ സർവ്വീസ്, വെർച്വൽ റിയാലിറ്റി സോൺ, പെറ്റ്സ് പാർക്ക്, മഡ് റെയ്സ് കോഴ്സ് എന്നിവയും ആരംഭിക്കും.തിരുവനന്തപുരം ജില്ലാ ടൂറിസം പ്രമോഷൻ കൗൺസിലും യുവജന സഹകരണ സ്ഥാപനമായ വട്ടിയൂർക്കാവ് യൂത്ത് ബ്രിഗേഡ് എൻ്റർപ്രണേർസ് കോ.ഒപ്പറേറ്റീവ് സൊസൈറ്റിയും സംയുക്തമായാണ് ആക്കുളം സാഹസിക വിനോദ സഞ്ചാര കേന്ദ്രത്തിന്റെ നടത്തിപ്പും പരിപാലനവും.

ആക്കുളത്ത് നിര്‍മ്മിക്കാന്‍ ഉദ്ദേശിക്കുന്ന ഗ്ലാസ് ബ്രിഡ്ജിന്‍റെ മാതൃകയും മന്ത്രി പങ്കുവെച്ചിട്ടുണ്ട്. പുതിയ ഗ്ലാസ് ബ്രിഡ്ജിന്‍റെ വരവോടെ തലസ്ഥാനത്തെ ടൂറിസം കേന്ദ്രങ്ങളില്‍  ആക്കുളം ടൂറിസം വില്ലേജ് ശ്രദ്ധേയമായ സ്ഥാനം നേടുമെന്ന് ഉറപ്പാണ്.