5 മാസങ്ങൾക്ക് ശേഷം മത്സ്യബന്ധനം പുനരാംരഭിച്ചു; എങ്കിലും കടലിൽ പോകാനാകാതെ കോഴിക്കോട്ടെ തൊഴിലാളികൾ

നീണ്ട ഇടവേളയ്ക്കു ശേഷം സംസ്ഥാനത്ത് മത്സ്യബന്ധനം പുനരാരംഭിച്ചിട്ടും മത്സ്യ ബന്ധനത്തിന് പോവാൻ കഴിയാത്ത അവസ്ഥയിലാണ് കോഴിക്കോട് ജില്ലയിലെ മത്സ്യതൊഴിലാളികൾ. ജില്ലയിലെ ബേപ്പൂർ, പുതിയാപ്പ, കൊയിലാണ്ടി ഹാർബറുകളിലെ തൊഴിലാളികളാണ് ജോലിക്ക് പോവാൻ കഴിയാതെ ബുദ്ധിമുട്ടുന്നത്.

ഹാർബറുകൾ ഉൾപ്പെടുന്ന ഈ മേഖലകൾ കണ്ടെയ്മെന്റ് സോണിൽ ഉൾപ്പെട്ടതാണ് പ്രതിസന്ധിക്ക് കാരണം. ലോക്ക്ഡൗൺ നിയന്ത്രണവും ട്രോളിംഗ് നിരോധനവും കാരണം അഞ്ചു മാസത്തിലേറെയാണ് മത്സ്യ ബന്ധനം മുടങ്ങിയതിന് പിന്നാലെയാണ് ഇപ്പോൾ ഹാർബറുകൾ കണ്ടെയ്മെന്റ് സോണിൽ ഉൾപ്പെട്ടിരിക്കുന്നത്‌.

ഒരോ ബോട്ടുകളിലും ഇരുപത് പേരിൽ കുറയാത്ത ആളുകളാണ് ജോലി നോക്കുന്നത്. ഒരു ബോട്ട് ഇറക്കുവാൻ 60 ലക്ഷം മുതൽ ഒരു കോടി 15 ലക്ഷം രൂപ വരെയാണ് ചെലവ് വരുന്നത്.

മൂന്നും, നാലും പേർ കൂടി കിടപ്പാടം പണയപ്പെടുത്തി ബാങ്ക് വായ്പ എടുത്താണ് ഭൂരിഭാഗം ബോട്ടുകളും വാങ്ങുന്നത്. എന്നാൽ തൊഴിലിന് പോവാൻ കഴിയാതെ വന്നതോടെ പല ബോട്ട് ഉടമകളുടെ വായ്പ തിരിച്ചടവ് മുടങ്ങിയിരിക്കുകയാണ്.

പുതിയാപ്പ ഹാർബറിൽ മാത്രം 300-ൽപ്പരം ബോട്ടുകളാണ് മത്സ്യ ബന്ധനത്തിന് പോവാൻ കഴിയാതെ കിടക്കുന്നത്. കഴിഞ്ഞ അഞ്ചാം തീയതി ഹാർബർ ഉൾപ്പെടുന്ന കോഴിക്കോട് കോപറേഷൻ പരിധിയിലെ 75-ാം വാർഡിൽ ആറു പേർക്കാണ് കോവിഡ് സ്ഥിരീകരിച്ചത്.

ഇതു മൂലമാണ് പ്രദേശം കണ്ടെയ്ൻമെന്റ് സോണിൽ ഉൾപ്പെട്ടത്. രോഗവ്യാപനത്തിന്റെ പശ്ചാത്തലത്തിൽ ഇന്ന് 200 പേർക്കാണ് ആന്റിജൻ പരിശോധന നടത്തുന്നത്. സമാനമായ സാഹചര്യമാണ് ബേപ്പൂർ, ചാലിയം മേഖലയിലും ഉള്ളത്.

ഇവിടെയും കൂടുതൽ കോവിഡ് കേസുകൾ റിപ്പോർട്ട് ചെയ്തതിനാൽ പ്രദേശം കണ്ടെയ്മെൻ്റ് സോണുകളിലാണ്. ഇവിടെയും ഇന്ന് ആന്റിജൻ പരിശോധന നടക്കുന്നുണ്ട്.