കൈയിൽ കാശില്ല എന്ന് കരുതി വിശന്നിരിക്കേണ്ട; ഹൃദയത്തിൽ നിറയെ സ്നേഹമുള്ള എറണാകുളത്തെ കപ്പൂച്ചിൻ മെസ്സിലേക്ക് പോരേ

'അത്രേം വലിയ മണി കെട്ടാൻ മാത്രം ഒന്നും ഇല്ല ഇന്ന് കഞ്ഞിയും പയറുവാ.." എറണാകുളം തൃപ്പൂണിത്തുറയിൽ ഉള്ള കപ്പൂച്ചിൻ മെസിലെ ഒരു ചുമർവാചകം ഇങ്ങനെയാണ്. ആവശ്യത്തിന് കഴിക്കാം.

പെട്ടിയിൽ നിറയുന്ന പണം അല്ല വിശപ്പാണ് മാറേണ്ടത് എന്ന് കരുതുന്നവർ എറണാകുളം തൃപ്പൂണിത്തുറയിൽ ഉള്ള കപ്പുച്ചിൻ മെസ്സിൽ എത്തിയാൽ വയറുനിറച്ച് ഭക്ഷണം കഴിച്ചു മടങ്ങാം. കൈയിലുള്ള പണം മെസ്സിനോട്  ചേർന്നുള്ള ചെറിയ പോസ്റ്റ്പെട്ടിയിൽ നിക്ഷേപിക്കാം, ഒന്നും ഇല്ലെങ്കിലും കുഴപ്പമില്ല.

കപ്പൂചിൻ മെസ്സിൽ എത്തിയാൽ ഭക്ഷണത്തിന് മുന്നിൽ എല്ലാവരും ഒന്നാണ്. ഒരു മേശയിൽ ഒന്നിച്ചിരുന്ന് ഒരേ വിഭവങ്ങൾ കഴിക്കാം. കൈയിൽ കാശ് ഉള്ളവർക്ക് പെട്ടിയിൽ നിക്ഷേപിക്കാം. കൂടുതൽ പണം നൽകുകയാണെങ്കിൽ അത് അടുത്തദിവസം പണമില്ലാത്തവർക്ക് മുൻപിൽ അന്നമായി മാറും.

മെസ്സിൽ എത്തുന്നവർക്ക് ആവശ്യത്തിന് വയറുനിറയെ ഭക്ഷണം നൽകുകയല്ലാതെ പെട്ടിയിൽ ഇടുന്ന പണത്തെക്കുറിച്ച് നോക്കാൻ ഇവിടെ ആരും ഉണ്ടാകില്ല. വലിയ ആർഭാടങ്ങൾ ഒന്നും ഭക്ഷണത്തിൽ ഉണ്ടാകില്ല എന്ന് പറയുമ്പോഴും കപ്പുച്ചിൻ മെസ്സിലെ ഭക്ഷണത്തിന് വീട്ടിലെ സ്വാദാണ്.

ഗോതമ്പ് പുട്ട്, ദോശ, ഉപ്പുമാവ് എന്നിവയാണ് പ്രഭാതഭക്ഷണം. ഉച്ചയൂണിന് തോരനും അച്ചാറും പുളിയിഞ്ചിയും തീയലും ഉണ്ടാകും. വയറു മാത്രമല്ല കപ്പുച്ചിൻ മെസ്സിൽ എത്തി ഭക്ഷണം കഴിച്ചാൽ മനസ്സും നിറയും. ഫാദർ ബോബി ജോസ് കട്ടിക്കാടിന്റെ നേതൃത്വത്തിലാണ് മെസ്സിന്റെ പ്രവർത്തനം. രാവിലെ ഏഴര മുതൽ വൈകുന്നേരം വരെയാണ് പ്രവർത്തന സമയം.