Viral TikTok Video | വനം വകുപ്പ് വാഹനം ഉപയോഗിച്ച് ട്രക്കിങ് നടത്തിയ താത്കാലിക വാച്ചറുടെ പണി പോയി

വനം വകുപ്പിന്റെ ഔദ്യോഗിക വാഹനത്തിൽ കൂട്ടുകാരുമായി കാട്ടിൽ കറങ്ങി താത്കാലിക വാച്ചർ. യാത്രയുടെ വിഡിയോ ടിക് ടോകിൽ വൈറൽ ആയതോടെ വാച്ചറുടെ പണി പോയി

മലപ്പുറം കാളികാവ് റെയിഞ്ചിന് കീഴിലെ ചക്കിക്കുഴി ഫോറസ്റ്റ് സ്റ്റേഷനിൽ ആണ് സംഭവം.  ഫോറസ്റ്റ് സ്റ്റേഷനിലെ താൽകാലിക വാച്ചർ കൂട്ടുകാരുമായി വനത്തിലൂടെ ട്രക്കിങ്ങ് നടത്തുന്ന വീഡിയോ സോഷ്യൽ മീഡിയയിൽ പ്രചരിച്ചതോടെ താത്കാലിക വാച്ചറെ പിരിച്ചു വിട്ട്, സംഭവത്തിൽ അന്വേഷണം പ്രഖ്യാപിച്ചിരിക്കുകയാണ് വനം വകുപ്പ്.

ചക്കിക്കുഴി ഫോറസ്റ്റ് സ്റ്റേഷനിലെ താൽകാലിക വാച്ചർ ഫോറസ്റ്റിൻ്റെ ഔദ്യോഗിക വാഹനത്തിൽ  കൂട്ടുകാരുമായി ഉൾ വനത്തിലൂടെ ട്രക്കിങ്ങ് നടത്തുന്ന വീഡിയോയാണ് ടിക്ടോകിൽ പ്രചരിക്കുന്നത്

വന്യമൃഗങ്ങൾ ഏറെയുള്ളതും, പ്രവേശകർക്ക് കർശന നിയന്ത്രണമുള്ളതും സൈലൻ്റ് വാലി വനപ്രദേശത്തോട് ചേർന്ന ദുർഗഢമായ പാതയിലൂടെ ആണ് വാഹനം കടന്നുപോകുന്നത്.   ഫോറസ്റ്റ് വാഹനം ഓടിക്കുന്നത് താൽക്കാലിക വാച്ചർ ആണ്.

പ്രചരിക്കുന്ന വീഡിയോയിൽ മറ്റൊരു വനം വകുപ്പ് ജീവനക്കാരനും ഉണ്ട്. ഇക്കാര്യത്തിൽ വനം വകുപ്പ് പറയുന്നത് ഇങ്ങനെ. കാട്ടിനുള്ളിൽ ഉള്ള ടി.കെ കോളനിയിൽ പോയി വരിക ആയിരുന്നു വനം വകുപ്പ് ഉദ്യോഗസ്ഥർ. വാഹനത്തിൽ ഉള്ളത് കാട്ടാനകളെ ഓടിക്കാനും മറ്റും മേഖലയിൽ വനം വകുപ്പിനെ സഹായിക്കുന്ന യുവാക്കൾ ആണ്. അവരെ കൂടി വഴിയിൽ നിന്നും കയറ്റുക മാത്രമാണ് ചെയ്തത് എന്നാണ് വിശദീകരണം

പക്ഷേ ഔദ്യോഗിക സംവിധാനങ്ങളുടെ ദുരുപയോഗം നടന്നു എന്ന് കണ്ടതിനാൽ താത്കാലിക വാച്ചറെ പിരിച്ചു വിടുമെന്നും സംഭവത്തിൽ അന്വേഷണം നടത്തുമെന്നും നിലമ്പൂർ സൗത്ത് മേഖല ഡിഎഫ്ഒ സജികുമാർ  പറഞ്ഞു.