ക്യാൻസർ രോഗികൾക്ക് സൗജന്യ ചികിത്സയും പരിചരണവും; ആശ്വാസമായി മലപ്പുറം ഏറനാട്ടിലെ ആശുപത്രി
ക്യാൻസർ നിർണയ ചികിത്സയ്ക്കുവേണ്ടി ദൂരെയുള്ള സ്ഥലങ്ങളിലേക്ക് പോകുന്ന മലപ്പുറത്തുകാർക്ക് ഇത് ഏറെ ആശ്വാസമാകും ഈ ആശുപത്രി മുഖ്യമന്ത്രി പിണറായി വിജയൻ ഓൺലൈൻ വഴി ആണ് ഹോസ്പിറ്റൽ ഉദ്ഘാടനം ചെയ്തത്.
നാടിന് മുഴുവൻ മാതൃക ആകുന്ന, ആശ്വാസമാകുന്ന സംരഭം ആണ് മലപ്പുറം ഏറനാട് എടവണ്ണയിൽ തുടങ്ങിയ സീതി ഹാജി കാൻസർ ഡിറ്റക്ഷൻ ആൻഡ് ട്രീറ്റ്മെൻറ് സെൻറർ. മലപ്പുറം ജില്ലയിൽ ക്യാൻസർ രോഗം ബാധിച്ച ഒട്ടനവധി ദൗർഭാഗ്യവാന്മാർക്ക് അനുഗ്രഹം ആകുന്നത് ആണ് ഈ കേന്ദ്രം . ഏറെ ചെലവേറിയ ചികിത്സകള് പൂർണമായും സൗജന്യമായി ആണ് ഇവിടെ നൽകുക
എംഎൽഎ പികെ ബഷീറിൻ്റെ ഒരു സ്വപ്നമാണ് ഏറനാട്ടിൽ ഉദ്ഘാടനം ചെയ്ത ഈ കാൻസർ ചികിത്സ കേന്ദ്രം.എന്ത് കൊണ്ട് ഈ ആശുപത്രി എന്ന ചോദ്യത്തിന് പികെ ബഷീർ ഇങ്ങനെ പറയുന്നു " ഒരു പിതാവിന് കാൻസർ ബാധിച്ചാൽ മകൻ അനുഭവിക്കുന്ന വേദനയും മകൾക്ക് ഈ രോഗം വന്നാൽ പിതാവ് അനുഭവിക്കുന്ന വേദനയും അനുഭവിച്ച ഒരാളാണ് ഞാൻ. നാട്ടിൽ ഒരു കാൻസർ ആശുപത്രി സ്ഥാപിക്കുക എന്നത് എൻ്റെ ഒരു സ്വപ്നം ആയിരുന്നു."
പികെ ബഷീറിൻ്റെ പിതാവും മുതിർന്ന മുസ്ലിം ലീഗ് നേതാവും മുൻ ചീഫ് വിപ്പുമായ പി. സീതി ഹാജി കാൻസർ ബാധിച്ച് 59 ആം വയസിലാണ് മരിച്ചത്. പികെ ബഷീർ എംഎൽഎയുടെ നിതാന്ത പരിശ്രമം ആണ് ഈ ആശുപത്രി. അദ്ദേഹം മുന്നോട്ട് വച്ച നിർദേശങ്ങൾ സ്വീകരിച്ച് പദ്ധതിക്ക് ഒപ്പം മുഖ്യമന്ത്രിയും ആരോഗ്യ മന്ത്രിയും നിന്നു. മലബാർ കാൻസർ സെൻ്ററിൻ്റെ പിന്തുണയും സഹായവും കൂടി ലഭിച്ചതോടെ സീതി ഹാജി മെമോറിയൽ കാൻസർ സെൻ്റർ യാഥാർഥ്യമായി
കേരളത്തിൽ ആദ്യമായാണ് ഒരു സാമൂഹിക ആരോഗ്യ കേന്ദ്രത്തിൽ ക്യാൻസർ രോഗ ചികിത്സ കേന്ദ്രം ആരംഭിക്കുന്നത്. ക്യാൻസർ രോഗ ചികിത്സക്ക് വേണ്ട മാമോഗ്രാം, എക്സറെ, അൾട്രാസൗണ്ട് സ്കാനിങ്, കീമോതെറാപ്പി, ലബോട്ടറി തുടങ്ങി എല്ലാവിധ സജ്ജീകരണങ്ങളും സെൻറിൽ ഉണ്ട്. എം.എല്‍.എ.യുടെ ആസ്തി വികസന ഫണ്ടില്‍ നിന്ന് 2 കോടി രൂപ ചെലവഴിചാണ് രണ്ട് കെട്ടിടങ്ങള്‍ നിര്‍മ്മിച്ചത്.
ഇതിന് പുറമെ മാമോഗ്രാം മെഷീന്‍ വാങ്ങുന്നതിന് മലപ്പുറം ജില്ലാ പഞ്ചാത്ത് 27.5 ലക്ഷം രൂപ അനുവദിച്ചു.ലോകബാങ്ക് ധനസഹായ പദ്ധതിയിലുള്‍പ്പടുത്തി ഉപകരണങ്ങളും ലാബും തയ്യാറാക്കുന്നതിനായി 27 ലക്ഷം രൂപ എടവണ്ണ ഗ്രാമപഞ്ചായത്ത് അനുവദിച്ചു. അതോടൊപ്പം ഒന്നരകോടി രൂപയുടെ മെഡിക്കല്‍ ഉപകരണങ്ങള്‍ പികെ ബഷീർ എംഎൽഎയുടെ ബന്ധുക്കള്‍, കുടുംബാംഗങ്ങള്‍ നാട്ടുകാര്‍, പ്രവാസികള്‍ തുടങ്ങിയവരുടെയൊക്കെ സഹായം കൊണ്ടാണ് ലഭ്യമായത്.
