ക്യാൻസറിനെ അതിജീവിച്ചവരുടെയും ചികിത്സയിൽ ഉള്ളവരുടെയും കൂട്ടായ്മ; അതിഥികളായി ചാക്കോച്ചനും മഞ്ജരിയും സി കെ വിനീതും

തലശ്ശേരിയിലെ മലബാർ കാൻസർ സെൻററിൽ ചികിത്സയിലുള്ളവരുടെയും, രോഗം ഭേദമായവരുടെയും കൂട്ടായ്മ സംഘടിപ്പിച്ചു. അമൃതം 2022 എന്ന പേരിൽ മലബാർ കാൻസർ സെന്ററും, തലശ്ശേരി മുനിസിപ്പാലിറ്റിയും കണ്ണൂർ ജില്ലാ പഞ്ചായത്തും കണ്ണൂർ കാൻസർ കൺട്രോൾ കൺസോർഷ്യവും  സംയുക്തമായി ആണ് പരിപാടി നടത്തിയത്.

കാൻസറിനെ കുറിച്ചുള്ള മിഥ്യാ ധാരണകൾ ഇല്ലാതാക്കുക, അതിജീവിതർക്കും രോഗികൾക്കും ഉള്ള അപകർഷതാ ബോധം കുറക്കുക എന്ന ലക്ഷ്യത്തോടുകൂടിയാണ് അമൃതം 2022  സംഘടിപ്പിച്ചത്.

വർണ്ണ വൈവിധ്യം കൊണ്ടു, താര സാന്നിധ്യം കൊണ്ടും സമ്പന്നമായ അമൃതം 2022, തലശ്ശേരി മുനിസിപ്പൽ ടൗൺ ഹാളിൽ കേരള മുഖ്യമന്ത്രി  പിണറായി വിജയൻ ഓൺ ലൈനായി  ഉദ്‌ഘാടനം ചെയ്തു.

മലബാർ കാൻസർ സെന്റർ പോസ്റ്റ് ഗ്രാജുവേറ് ഇൻസ്റ്റിറ്റ്യൂട്ട് ഓഫ് ഒങ്കോളജി സയൻസ് ആൻഡ് റിസേർച്ച് ആയി മാറുന്നതോടെ കൂടുതൽ മെഡിക്കൽ വിദ്യാർഥികളും ഗവേഷകരും സ്ഥാപനത്തിന്റെ ഭാഗമാകുമെന്നും മുഖ്യമന്ത്രി പറഞ്ഞു. സെന്ററിന്റെ വളർച്ച ദ്രുതഗതിയിലാകുമെന്നും,  ചികിത്സാ സൗകര്യങ്ങൾ മെച്ചപെടുമെന്നും മുഖ്യമന്ത്രി വ്യക്തമാക്കി.

കണ്ണൂർ ജില്ലയെ 2025ഓടെ കാൻസർ വിമുക്തമാക്കുന്നതിനായി ജില്ലയിലെ തദ്ദേശ സ്ഥാപങ്ങളുമായി ചേർന്ന് പരിപാടികൾ ആരംഭിച്ചതായി  കണ്ണൂർ ജില്ലാ പഞ്ചായത്ത് പ്രസിഡന്റ് പി പി ദിവ്യ പറഞ്ഞു. അഡ്വ. എ എൻ ഷംസീർ എം എൽ എ, തലശ്ശേരി നഗരസഭാ ചെയർപേഴ്സൺ ജമുനാറാണി ടീച്ചർ, വാർഡ് കൗൺസിലർമാരായ വി. വസന്ത, റാഷിദ ടീച്ചർ, തലശ്ശേരി സബ് കളക്ടർ അനുകുമാരി,  ഡോ. സതീശൻ ബി, ഡോ.ജിതിൻ തുടങ്ങിയവർ ചടങ്ങിൽ പങ്കെടുത്തു

ചലച്ചിത്ര താരം  കുഞ്ചാക്കോ ബോബൻ,  പിന്നണി ഗായിക മഞ്ജരി, ഫുട്ബോൾ താരം സി  കെ വിനീത് എന്നിവർ ചടങ്ങിൽ പങ്കെടുത്തു. പരിപാടിയിൽ അതിജീവിതർ  അവരുടെ അനുഭവങ്ങൾ പങ്കുവെക്കുകയും സർഗ്ഗവാസനകൾ പ്രകടിപ്പിക്കുകയും ചെയ്തു.

കാൻസർ അതിജീവിതർ  തങ്ങളുടെ അനുഭവങ്ങളുടെ വെളിച്ചത്തിൽ രചിച്ച  സമർപ്പൺ  എന്ന പുസ്തകം കണ്ണൂർ ജില്ലാ പഞ്ചായത്ത് പ്രസിഡന്റ് പി പി ദിവ്യ, എഴുത്തുകാരിയും അതിജീവിതയുമായ സിത്താരക്ക് നൽകി പ്രകാശനം ചെയ്തു.

കാൻസർ ചികിത്സകരും മറ്റ് ആരോഗ്യ പ്രവർത്തകരും തങ്ങളുടെ അനുഭവങ്ങളുടെ വെളിച്ചത്തിൽ രചിച്ച സായൂജ്യ എന്ന പുസ്തകം ഫുട്ബോൾ താരം സി. കെ വിനീത് വടകര ലയൺസ് ക്ലബ് പ്രസിഡന്റ് പ്രസന്നക്കു നൽകിക്കൊണ്ടും പ്രകാശനം ചെയ്തു.