M Shivasankar| എസ്എസ്എൽസി രണ്ടാം റാങ്ക്;പ്രഗത്ഭനായ ഉദ്യോഗസ്ഥൻ; വിശ്വസ്തൻ; അപ്രതീക്ഷിത പതനം

തിരുവനന്തപുരം: മുഖ്യമന്ത്രിയുടെ മുൻ പ്രിസിപ്പൽ സെക്രട്ടറിയും ഐ.ടി സെക്രട്ടറിയുമായ എം ശിവശങ്കർ അച്ചടക്ക നടപടിക്ക് വിധേയനായത് സിവിൽ സർവീസ് ചരിത്രത്തിൽ തന്നെ സമാനതകളില്ലാത്ത വിവാദങ്ങളുടെ പേരിൽ.

സ്വർണക്കടത്ത് വിവാദത്തിലൂടെ, വാക്കിലും പ്രവർത്തിയിലും കാർക്കശ്യം കാട്ടുന്ന മുഖ്യമന്ത്രിയുടെ ഓഫീസിലെ ഏറ്റവും ശക്തനായ ഉദ്യോഗസ്ഥന്റെ കസേരയിൽ നിന്നാന്നാണ് സംസ്ഥാനത്തെ ഏറ്റവും മുതിർ ന്ന ഐ.എ.എസുകാരന്റെ പടിയിറക്കം.

എസ്എസ്എല്‍സി പരീക്ഷയിൽ രണ്ടാം റാങ്ക് നേടിയ ശിവശങ്കർ എന്‍ജിനീയറിംഗ് ബിസിനസ് അഡ്മിനിസ്‌ട്രേഷൻ ബിരുദങ്ങൾ സ്വന്തമാക്കിയതും മികച്ച മാർക്കോടെയായിരുന്നു. പാലക്കാട് എന്‍എസ്എസ് എന്‍ജിനീയറിംഗ് കേളജിലായിരുന്നു ബി.ടെക് പഠനം. എസ്.എഫ്.ഐയുടെ തീപ്പൊരി നേതാവായിരുന്ന ശിവശങ്കർ കോളജ് യൂണിയന്‍ ചെയര്‍മാനായും തെരഞ്ഞെടുക്കപ്പെട്ടു. ബി. ടെക്കിന് പിന്നാലെ ഗുജറാത്തിലെ 'ഇര്‍മ'യില്‍നിന്നു റൂറല്‍ മാനേജ്‌മെന്റില്‍ പിജി ഡിപ്ലോമ നേടി.

ആദ്യ ജോലി റിസര്‍വ് ബാങ്കിലായിരുന്നു. പിന്നീട് പി.എസ്.സി പരീക്ഷയെഴുതി കേരള റവന്യൂ സർവീസിൽ ഡപ്യൂട്ടി കലക്ടറായി. സർവീസിൽ തുടരുന്നതിനിടെ 1995ലാണ് സംസ്ഥാന സർക്കാരിന്റെ ശുപാർശയിൽ സിവിൽ സർവീസ് ലഭിക്കുന്നത്. 2000-ൽ ഐ.എ.എസ് സ്ഥിരപ്പെടുത്തിയുള്ള ഉത്തരവിറങ്ങി.

തുടർന്ന് മലപ്പുറം കലക്ടറായി പ്രവർത്തിച്ചു. ടൂറിസം ഡയറക്ടര്‍, പൊതു വിദ്യാഭ്യാസ ഡയറക്ടര്‍, സെക്രട്ടറി, മരാമത്ത് സെക്രട്ടറി എന്നീ തസ്തികകളിലും പ്രവർത്തിച്ചിട്ടുണ്ട്. ശിവശങ്കർ വൈദ്യുതി ബോര്‍ഡ് ചെയര്‍മാനായിരിക്കെയാണ് സംസ്ഥാനത്ത് പവര്‍ കട്ട് ഇല്ലാതാക്കുന്നതിനുള്ള സുപ്രധാന തീരുമാനമെടുക്കുന്നത്.

സംസ്ഥാനത്ത് ദേശീയ ഗെയിംസ് നടക്കുമ്പോൾ സ്പോട്സ് സെക്രട്ടറി ശിവശങ്കറായിരുന്നു. ഇടതു ബന്ധവും മികച്ച ഉദ്യോഗസ്ഥനെന്ന പേരുമാണ് ശിവശങ്കറെ മുഖ്യമന്ത്രി പിണറായി വിജയന്റെ ഓഫീസിലെത്തിച്ചത്. ഐ.ടി സെക്രട്ടറിക്കു പുറമെ മുഖ്യമന്ത്രിയുടെ പ്രിൻസിപ്പിൽ സെക്രട്ടറിയുടെ കസേരയും ശിവശങ്കറെ തേടിയെത്തി.

സംസ്ഥാന സർക്കാരിന്റെ എല്ലാ നിർണായക തീരുമാനങ്ങൾക്കു പിന്നിലും ശിവശങ്കറിന്റെ കരങ്ങളുണ്ടായിരുന്നു. സി-ഡിറ്റിനെ ഐ.ടി വകുപ്പിന് കീഴിലാക്കാൻ തീരുമാനച്ചതും പ്രളയാനന്തര പ്രവർത്തനങ്ങൾക്കായി റീ ബിൽഡ് കേരള രൂപീകരിച്ചതിന് പിന്നിലും ശിവശങ്കറായിരുന്നു.

സ്വർണക്കടത്ത് കേസിലുണ്ടായ വിവാദങ്ങൾ എല്ലാ തകിടം മറിച്ചു. 2023 ജനുവരി 31 വരെ സർവീസുണ്ടായിരുന്ന ശിവശങ്കർ അധികാര കേന്ദ്രങ്ങളിൽ നിന്നും പുറത്താക്കപ്പെട്ടു.