കരിപ്പൂർ വിമാനത്താവളത്തിൽ വൻ സ്വർണ്ണവേട്ട; പിടികൂടിയത് ഒരുകോടിയിലധികം വിലവരുന്ന 2.3 കിലോ സ്വർണം

കരിപ്പൂർ വിമാനത്താവളത്തിൽ അനധികൃതമായി കടത്താൻ ശ്രമിച്ച കോടികളുടെ സ്വർണം പിടികൂടി. 2311.3 ഗ്രാം ( 2.3 കിലോ)   സ്വർണം ആണ് എയർ കസ്റ്റംസ് ഇന്റലിജിൻസ് വിഭാഗം പിടികൂടിയത്. ഇതിന് വിപണിയിൽ 1 കോടി 15 ലക്ഷം  രൂപ വില വരും.

രണ്ട് വ്യത്യസ്ത  സംഭവങ്ങളിലായാണ്  ഇത്രയും സ്വർണം പിടിച്ചെടുത്തത്.

കഴിഞ്ഞ ദിവസം വൈകുന്നേരം 5 മണിക്ക് ദുബായിൽ നിന്നുo കോഴിക്കോടെത്തിയ  സ്പൈസ് ജെറ്റ് SG 141 ലെ യാത്രക്കാരനായ മലപ്പുറം സ്വദേശി സലാം (54 വയസ് ) എന്നയാളിൽ നിന്നാണ് 1568.2ഗ്രാം സ്വർണ്ണം പിടികൂടിയത്. മിശ്രിത രൂപത്തിൽ ഹാന്‍ഡ് ബാഗേജിൽ ഒളിപ്പിച്ച് കടത്താനായിരുന്നു  ശ്രമം.

ഇതേ വിമാനത്തിന്റെ ശുചിമുറിയിൽ നിന്നാണ്   1262.20 ഗ്രാം സ്വർണ മിശ്രിതം പിടികൂടിയത്. ശുചിമുറിയിൽ ഒളിപ്പിച്ച നിലയിൽ ആയിരുന്നു സ്വർണം.

കസ്റ്റംസ് ഡെപ്യൂട്ടി കമ്മിഷണർ ടി. എ. കിരണിന്റെ നേതൃത്വത്തിൽ  സൂപ്രണ്ടുമാരായ സുധീർ , പൗലോസ് വി ജെ., സുബീഷ് സി.പി, ഇൻസ്പെക്ടർമാരായ സുമൻ ഗോദരാ, റഹീസ് എൻ. പ്രേം പ്രകാശ് മീണാ, ചേതൻ ഗുപ്ത ഹെഡ് ഹൽദാറായ ചന്ദ്രൻ കെ എന്നിവരടങ്ങുന്ന  സംഘമാണ് സ്വർണ്ണം പിടികൂടിയത്.