അരിക്കൊമ്പനെ പിടികൂടുന്നത് മാറ്റിയതിൽ പ്രതിഷേധം; ഇടുക്കിയിൽ 7 പഞ്ചായത്തുകളിലെ ഹർത്താൽ പൂർണം

തൊടുപുഴ: അരിക്കൊമ്പനെ പിടികൂടുന്നത് വൈകുന്നതിൽ ഇടുക്കിയിലെ വിവിധ പഞ്ചായത്തുകളിൽ നടത്തിയ ഹർത്താൽ പൂർണ്ണം. 13 പഞ്ചായത്തുകളിലായിരുന്നു ആദ്യം ഹർത്താൽ പ്രഖ്യാപിച്ചിരുന്നത്. ഇതിൽ നിന്ന് ഇടമലക്കുടി, രാജകുമാരി, ബൈസൺവാലി, സേനാപതി, ഉടുമ്പൻ ചോല എന്നീ പഞ്ചായത്തുകളെ പിന്നീട് ഒഴിവാക്കിയായിരുന്നു ജനകീയ ഹർത്താൽ നടത്തിയത്.

വിവിധ സ്ഥലങ്ങളിൽ സമരക്കാർ കൊച്ചി ധനുഷ്ക്കോടി ദേശീയ പാതയും സിമന്റ് പലത്ത് റോഡും ഉപരോധിച്ചു. അരികൊമ്പനെ പിടികൂടുന്നത് വരെ വിവിധ മേഖലകളിൽ സമരം തുടരും. അരിക്കൊമ്പനെ പിടികൂടുന്നതിനെതിരെ കോടതിയിൽ നിന്നും പരാമർശം ഉണ്ടായതോടെയാണ് ഇടുക്കിയിൽ സമരം ശക്തമായത്.

കടകമ്പോളങ്ങൾ അടഞ്ഞുകിടന്നു. ബോഡിമെട്ടിലും, പൂപ്പാറയിലും പെരിയകനാലിലും വൈകിട്ട് ആറു വരെ ദേശീയപാത ഉപരോധിച്ചു. ഓരോ മണിക്കൂർ ഇടവിട്ട് മാത്രമാണ് വാഹനങ്ങൾ കടത്തി വിട്ടത്. വിനോദ സഞ്ചാരികളും തമിഴ്നാട്ടിൽ നിന്നെത്തിയവരും മണിക്കൂറുകളോളം വഴിയിൽ കുടുങ്ങി.

കുങ്കികളെ തളച്ചിരിക്കുന്ന സിമൻറ് പാലത്തിനു സമീപം സിങ്കു കണ്ടത്തെ ആളുകൾ വൈകുന്നേരം വരെ റോഡ് ഉപരോധിച്ചു. വിവിധ സ്ഥലങ്ങളിൽ പ്രതിഷേധ പ്രകടനം നടന്നു. പൂപ്പാറയിൽ നേരിയ സംഘർഷം ഉണ്ടായി.

നാളെ മുതൽ സിങ്കുകണ്ടത്ത് രാപ്പകൽ സമരം തുടങ്ങും. പൂപ്പാറയിൽ മൂന്നു മണി മുതൽ ആറു വരെ മൂന്ന് പഞ്ചായത്തിലെ ജനപ്രതിനിധികൾ ധർണ നടത്തും.