LOCK DOWN| സെവൻസ് കളിക്കാനെത്തിയ ഐവറി കോസ്റ്റ് താരങ്ങൾ മലപ്പുറത്ത് കുടുങ്ങി

മലപ്പുറത്തെ സെവൻസ് ഫുട്ബോൾ മൈതാനങ്ങളിൽ ആവേശം നിറക്കാൻ കടൽ കടന്നെത്തിയ വിദേശ താരങ്ങളും ലോക് ഡൗണിൽ പെട്ടിരിക്കുകയാണ്. കൊണ്ടോട്ടി അടുത്ത് ചെരളപ്പാലത്ത് വാടകക്ക് എടുത്ത വീട്ടിൽ പാചകവും, പാട്ടും, പ്രാർത്ഥനയും ഇടക്ക് ഫുട്ബോൾ ഡ്രിബ്ബ്ലിങ്ങും ഒക്കെയായി ദിവസം തള്ളിനീക്കുകയാണ് ആറംഗ സംഘം.

ലുല്ലു, സോസോ,റോക്കി,ജെയിംസ്, ബാബാ, സെഡ്രിക്. ആറ്പേരും ഐവറികോസ്റ്റുകാരാണ്. ഡിസംബർ മുതൽ ജൂൺ വരെ നീളുന്ന സെവൻസ് ഫുട്ബോൾ സീസണിൽ നേട്ടം കൊയ്യാൻ സ്വപ്നം കണ്ടു കേരളത്തിൽ എത്തിയവരാണ് ഇവർ.

മാർച്ച് ആദ്യം ആയപ്പോഴേക്കും കളിക്കളങ്ങൾ അടച്ചുപൂട്ടി. അന്നുതൊട്ട് ഈ വീട്ടിൽ ഇരിപ്പാണ് എല്ലാവരും. കളി ഇല്ലാത്തതുകൊണ്ട് കയ്യിൽ കാശില്ല. സ്പോൺസർമാർ ഭക്ഷണവും മറ്റ് അത്യാവശ്യ കാര്യങ്ങളും ഒരുക്കി നൽകും. ഇനി എത്ര ദിവസം ഇങ്ങനെ ഇരിക്കേണ്ടി വരുമെന്ന് അറിയില്ലല്ലോ. ആശങ്ക ഉണ്ട് . ലുലു പറഞ്ഞു.

ഐവറികോസ്റ്റിലെ സ്ഥിതിയും വ്യത്യസ്തമല്ല . ഇന്ത്യയെപ്പോലെ എല്ലാം അടച്ചു പൂട്ടിയിരിക്കുകയാണ്. അവിടെ നിന്നും വിവരങ്ങൾ അറിയുമ്പോൾ ടെൻഷൻ കൂടും. എങ്ങനെയെങ്കിലും പ്രിയപ്പെട്ടവരുടെ അരികിലേക്ക് എത്തിയാൽ മതി. റോക്കി പറഞ്ഞു.

കേരളത്തിൽ നിന്നും നേരിട്ട് ഐവറി കോസ്റ്റ് ലേക്ക് പണം അയക്കാൻ കഴിയില്ല എന്നതാണ് ഇവർ നേരിടുന്ന പ്രതിസന്ധിയെന്ന് ഇവരുടെ മാനേജർ വ്യക്തമാക്കി. ദുബായിലേക്ക് പണം അയച്ചു അവിടെ നിന്നും അത് ഐവറി കോസ്റ്റി ലേക്ക് ലേക്ക് ട്രാൻസ്ഫർ ചെയ്യുകയാണ് പതിവ്. ഇതും ഇവർക്ക് ആശങ്ക നൽകുന്നു.

നമ്മുടെ നാട്ടിലെ ഭക്ഷണ രീതിയല്ല ഇവരുടേത്. ഭക്ഷണം എല്ലാം സ്വയം പാകം ചെയ്യും. മന്തി ചോറും ചിക്കനും നേന്ത്രപ്പഴം പൊരിക്കുന്നതും എല്ലാം അവരുടെ സ്വന്തം രീതിയിൽ . ഐവറി കോസ്റ്റിലെ തട്ടുപൊളിപ്പൻ പാട്ടുകളും കേട്ട് വാടക വീടിനു മുൻപിൽ പന്ത് തട്ടി ചടഞ്ഞു കൂടി ഇരിക്കുക ആണ് ഇവർ.

എത്രയും വേഗം നാട്ടിലേക്ക് പോകാനുള്ള സംവിധാനം സർക്കാർ ഒരുക്കി തരണം എന്നാണ് ഇവരുടെ അപേക്ഷ. മലപ്പുറം ജില്ലയിൽ ഇവരെപ്പോലെ വിദേശത്തു നിന്നെത്തിയ സെവൻസ് ഫുട്ബോൾ കളിക്കാൻ 200ലേറെ പേരുണ്ട് . എല്ലാവരും ഓരോ സ്ഥലത്ത് കുടുങ്ങിക്കിടക്കുകയാണ്. ജന്മനാട്ടിലേക്ക് എന്നു തിരിച്ചു പോകാനാകും എന്നതാണ് ഇവരുടെ മുൻപിൽ ഇപ്പോഴത്തെ ചോദ്യം.