'സ്ഥാനമില്ലെങ്കിലും സാമൂഹിക പ്രവർത്തനങ്ങൾ തുടരും'; കൊല്ലംകോട് നിന്നും മത്സരിച്ച ജ്യോതി പറയുന്നു

സി.ആർ.പി.എഫ്. ജവാന്റെ ജീവൻ രക്ഷിക്കുന്നതിനിടയിൽ വലതു കൈ നഷ്‌ടപ്പെട്ട ജ്യോതി തിരഞ്ഞെടുപ്പിൽ മത്സരിക്കുന്നത് വാർത്തയായിരുന്നു. പാലക്കാട് കൊല്ലങ്കോട് നിന്നും മത്സരിച്ച ജ്യോതിക്ക് പക്ഷെ മൂന്നാം സ്ഥാനമേ നേടാൻ കഴിഞ്ഞുള്ളു. ഇടതുകോട്ടയായ ഇവിടെ യു.ഡി.എഫ്. ആണ് രണ്ടാം സ്ഥാനത്ത്. 1600ൽ പരം വോട്ടുകൾ നേടി ബി.ജെ.പി. സ്ഥാനാർഥിയായ ജ്യോതി മൂന്നാം സ്ഥാനത്തുണ്ട്

പത്ത് വർഷം മുൻപ് ജവാനായ വികസിനെ ഒരു ബസ് യാത്രക്കിടയിൽ രക്ഷപെടുത്തുന്നതിനിടെയാണ് ജ്യോതിയുടെ കൈ അറ്റുപോയത്. ശേഷം വികാസ് എന്ന ആ ജവാന്റെ ഭാര്യയായി ജ്യോതി കേരളത്തിലെത്തി. വിജയം കൈപ്പിടിയിൽ ഒതുങ്ങിയില്ലെങ്കിലും ജനങ്ങൾക്കിടയിൽ പ്രവർത്തിക്കുന്നത് തുടരും എന്ന് ജ്യോതി പറയുന്നു

"സ്ഥാനമില്ലെങ്കിലും സാമൂഹിക പ്രവർത്തനങ്ങൾ തുടരും. ജനങ്ങൾക്കിടയിൽ പ്രവർത്തിക്കാനാണ് താൽപര്യം. ഒരു സ്ഥാനത്ത് ഇരിക്കാതെ അതു ചെയ്യുക എന്നത് വെല്ലുവിളിയാണ്. കഴിയുന്നതു പോലെ ഞാൻ പ്രവർത്തിക്കും. കഴിഞ്ഞ തവണത്തേതിനേക്കാൾ ഇവിടെ ഇത്തവണ മെച്ചപ്പെട്ടു. എനിക്ക് വേണ്ടി വോട്ട് ചെയ്തവരോടും പ്രാർഥിച്ചവരോടും ഈ അവസരത്തിൽ നന്ദി അറിയിക്കുന്നു. തോൽവിയിൽ ഒട്ടും തന്നെ വിഷമമില്ല. ഇത് ഒരു അനുഭവമായി കാണുകയാണ്," മനോരമയ്ക്ക് നൽകിയ അഭിമുഖത്തിൽ ജ്യോതി പറയുന്നു

2010ൽ  സഹോദരൻ വിശാലിനെ കാണാൻ വികാസ് ബസിൽ പോയിവരും നേരമാണ് അപകടമുണ്ടാവുന്നത്. ഛത്തീസ്ഗഡിലായിരുന്നു സംഭവം. ശേഷം ജ്യോതിയുടെ ചികിത്സയ്ക്കും മറ്റും ഒപ്പമുണ്ടായിരുന്നത് വികാസ് ആണ്. വീട്ടുകാർ പോലും കയ്യൊഴിഞ്ഞ ജ്യോതിയെ വികാസ് നാട്ടിലേക്ക് കൂട്ടിക്കൊണ്ടു വന്നു വിവാഹം ചെയ്യുകയായിരുന്നു