'പൗരത്വ നിയമ ഭേദഗതിക്കെതിരെ കേരളത്തിന്‍റെ നീക്കങ്ങൾ ശ്രദ്ധേയം' മുഖ്യമന്ത്രി പിണറായിയെ പുകഴ്ത്തി കനിമൊഴി

കൊച്ചി: പൗരത്വ നിയമത്തിനെതിരെ കേരള സർക്കാരും മുഖ്യമന്ത്രി പിണറായി വിജയനും സ്വീകരിക്കുന്ന നടപടികളെ പ്രശംസിച്ച് ഡിഎംകെ നേതാവ് കനിമൊഴി. പൗരത്വ നിയമത്തിനെതിരെ രാജ്യം ഒറ്റക്കെട്ടായി നിൽക്കാനുള്ള സമയമാണിത്. പൗരത്വ നിയമ ഭേദഗതിക്കെതിരെ കേരള മുഖ്യമന്ത്രിക്കൊപ്പം ഒരുമിച്ചു പോരാടാൻ ഉള്ള സാധ്യതകൾ പരിശോധിക്കുമെന്ന്  കനിമൊഴി ന്യൂസ് 18 നോട്‌ പറഞ്ഞു.

ഇത് സംബന്ധിച്ച് പാർട്ടി നേതാക്കളുമായി ആലോചിക്കും. പൗരത്വ നിയമത്തിനെത്തിരെയുള്ള കേരള സർക്കാരിന്റെ നീക്കങ്ങൾ   ശ്രദ്ധേയവും അഭിനന്ദഹാർഹവും ആണ്. ബില്ലിനെ പിന്തുണച്ച എഐഡിഎംകെയുടെ നിലപാട് ഏറെ വേദനിപ്പിച്ചു. ഇത്തരം ഒരു നിലപാട് സ്വീകരിച്ചത് തമിഴ് നാടിന് തന്നെ അപമാനമാണെന്ന് കനിമൊഴി പറഞ്ഞു.

ജെ എൻ യുവിൽ നടന്ന ആക്രമണങ്ങൾ വിദ്യാർത്ഥികളെ കേന്ദ്രികരിച്ചുള്ളതാണ്. ഇന്ത്യയെ ഹിന്ദു - ഹിന്ദി രാജ്യമാക്കാനാണ് ബിജെപി ശ്രമിക്കുന്നത്. നിയമം ഏറ്റവും കൂടുതൽ ബാധിക്കുന്നത് സ്ത്രീകളെ ആയിരിക്കുമെന്നും കനിമൊഴി പറഞ്ഞു.