കണ്ണൂരിൽ നിന്നുള്ള ശൈത്യകാല വിമാന സർവീസുകൾ പ്രഖ്യാപിച്ചു; ആഴ്ചയില്‍ 52 വിമാനങ്ങളെത്തും

കണ്ണൂർ രാജ്യാന്തര വിമാനത്താവളത്തിലെ ശൈത്യകാല വിമാന സർവീസ് സമയ പട്ടിക പുറത്തിറക്കി. ഒക്ടോബർ 25 മുതൽ 2021 മാർച്ച് 27 വരെയുള്ള സർവീസുകളാണ് തയ്യാറാക്കിയിട്ടുള്ളത്.  പുതിയ പട്ടിക പ്രകാരം ശൈത്യകാലത്ത് ആഴ്ച്ചയിൽ കണ്ണൂരിലേക്ക് 52 വിമാന സർവ്വീസുകൾ ഉണ്ടാവും. അത്രതന്നെ വിമാനങ്ങൾ കണ്ണൂരിൽനിന്ന് പുറപ്പെടുകയും ചെയ്യും.

ഘട്ടം ഘട്ടമായി ആഭ്യന്തര വിമാന സർവീസുകൾ വർധിപ്പിക്കാൻ കേന്ദ്ര സർക്കാർ അനുമതി നൽകിയതോടെ മിക്ക വിമാന കമ്പനികളും കൂടുതൽ സീറ്റുകളിലേക്ക് ബുക്കിംഗ് തുടങ്ങിയിട്ടുണ്ട്. രാജ്യാന്തര വിമാന സർവീസുകൾക്ക് നിലവിലുള്ള നിയന്ത്രണങ്ങൾ തുടരും.

ബെംഗളൂരു, ഹൈദരാബാദ്, തിരുവനന്തപുരം, ഹൂബ്ലി, ഡൽഹി, കൊച്ചി, ഗോവ, ചെന്നൈ എന്നിവിടങ്ങളിലേക്ക് നേരിട്ട് സർവ്വീസുകളുണ്ട്. ഹൈദരാബാദ്, ബെംഗളൂരു, ചെന്നൈ, ഡൽഹി, എന്നിവിടങ്ങളിലേക്ക് പ്രതി ദിന സർവീസുകളുണ്ടാകും.

ആഴ്ചയിൽ ബെംഗളൂരിവിലേക്ക് പതിനാല് സർവീസ് ഉണ്ടാകും. ബാംഗ്ലൂർ കഴിഞ്ഞാൽ കൂടുതൽ സർവീസുകൾ ഹൈദരാബാദിലേക്ക് ആണ്. 10 സർവീസുകളാണ് ഹൈദരാബാദിലേക്ക് ഉണ്ടാവുക. ഡൽഹി ചെന്നൈ എന്നിവിടങ്ങളിലേക്ക് എഴുവീതവും സർവീസുകൾ ഉണ്ടാകും.

തിരുവനന്തപുരം, ഗോവ എന്നിവിടങ്ങളിലേക്ക് നാലുവീതവും ഹൂബ്ലി, കൊച്ചി എന്നിവിടങ്ങളിലേക്ക് മൂന്നുവീതവും സർവ്വീസുകളുമാണ് ഇപ്പോൾ പ്രഖ്യാപിച്ചിട്ടുള്ളത്. ജയ്‌പൂർ, ലഖ്‌നൗ, കൊൽക്കത്ത, അഹമ്മദാബാദ്, ഗുവാഹത്തി, ഭോപാൽ, വിശാഖപട്ടണം എന്നിവിടങ്ങളിലേക്ക് കണക്ഷൻ സർവ്വീസുകളുമുണ്ട്.