'പാലാരിവട്ടം അഴിമതി ചൂണ്ടിക്കാട്ടിയതാണ് യുഡിഎഫിൽ നിന്ന് പുറത്തേക്ക് വഴിതുറന്നത്'; ഇബ്രാഹിംകുഞ്ഞിനെതിരെ കെ ബി ഗണേഷ്കുമാർ

പാലാരിവട്ടം പാലമടക്കം പൊതുമരാമത്ത് മന്ത്രിയുടെ ഓഫീസ് കേന്ദ്രീകരിച്ചുള്ള അഴിമതി ചൂണ്ടിക്കാട്ടിയതാണ് തനിക്ക് യുഡിഎഫിൽ നിന്ന് പുറത്തു പോകേണ്ട സാഹചര്യം ഉണ്ടാക്കിയതെന്ന് കെബി ഗണേഷ് കുമാർ. അഴിമതി അന്വേഷിക്കാൻ ആവശ്യപ്പെട്ടിട്ടും മുഖ്യമന്ത്രിയായിരുന്ന ഉമ്മൻചാണ്ടി അതിന് തയ്യാറായില്ലെന്നും ഗണേഷ്കുമാർ പറഞ്ഞു.

രാഷ്ട്രീയമായ സമ്മർദ്ദമായിരുന്നു അന്വേഷണത്തിന് തടസം നിന്നത്. നിയമസഭയിലും അഴിമതി ചൂണ്ടിക്കാട്ടിയിട്ടുണ്ടെന്നും ഗണേഷ് കുമാർ പറഞ്ഞു.

അന്ന് താൻ പറഞ്ഞപ്പോൾ വിശ്വസിക്കാൻ പലരും തയ്യാറായില്ല ഇപ്പോൾ സന്തോഷമുണ്ട്. പൊതുമരാമത്ത് മന്ത്രിയുടെ ഓഫീസ് കേന്ദ്രീകരിച്ചുള്ള അഴിമതി എല്ലാവർക്കും അറിവുള്ളതാണെന്നും ഗണേഷ്കുമാർ പ്രതികരിച്ചു.

ഗണേഷ്കുമാർ പരാതി ഉന്നയിച്ചതായി പറയുന്ന കാലത്ത് പാലത്തിന്റെ നിർമാണം തുടങ്ങിയിട്ടില്ലെന്നാണ് തോന്നുന്നതെന്നായിരുന്നു അന്നത്തെ പൊതുമരാമത്ത് മന്ത്രിയായിരുന്ന വി കെ ഇബ്രാഹിം കുഞ്ഞിന്റെ മറുപടി. ഗണേഷ‌ിന്റെ ആരോപണത്തിന് മേൽ ആവശ്യമെങ്കിൽ നിയമ നടപടി സ്വീകരിക്കും.

പാലത്തിന് അനുമതി നൽകിയത് ക്യാബിനറ്റ് ആണന്നും അതിൽ ഗണേഷിനടക്കം കൂട്ടുത്തരവാദിത്തം ഉണ്ടെന്നും ഇബ്രാഹികുഞ്ഞ് ന്യൂസ് 18നോട് പറഞ്ഞു.