Kerala Budget 2020 | എല്ലാ നഗരങ്ങളിലും ഷീ ലോഡ്ജ്; 1500 കോടിയുടെ സ്ത്രീ കേന്ദ്രീകൃത പദ്ധതികൾ

തിരുവനന്തപുരം: തോമസ് ഐസക് അവതരിപ്പിച്ച ബജറ്റിൽ സ്ത്രീ കേന്ദ്രീകൃത പദ്ധതികൾക്കായി 1509 കോടി രൂപയാണ് നീക്കിവച്ചിരിക്കുന്നത്.

600 കോടി രൂപയാണ് കുടുംബശ്രീയ്ക്ക് ബജറ്റില്‍ നീക്കിവച്ചിരിക്കുന്നത്. എല്ലാ നഗരങ്ങളിലും ഷീ ലോഡ്ജ് സ്ഥാപിക്കും. വിശപ്പ് രഹിത പദ്ധതിയുടെ ഭാഗമായി 25 രൂപക്ക് ഊണ് നൽകുന്ന 1000 ഭക്ഷണശാലകള്‍ കുടുംബശ്രീകള്‍ വഴി ആരംഭിക്കും. കുടുംബശ്രീ യൂണിറ്റുകള്‍ 200 കേരള ചിക്കന്‍ ഔട്ട്ലറ്റുകള്‍ തുറക്കുമെന്നും ധനമന്ത്രി പ്രഖ്യാപിച്ചു.

നാല് ശതമാനം പലിശയ്ക്ക് 3000 കോടിരൂപയുടെ ബാങ്ക് വായ്പ വനിതാ സംരംഭങ്ങള്‍ക്ക് ലഭ്യമാക്കും.

മത്സ്യത്തൊഴിലാളി സ്ത്രീകള്‍ക്ക് ഇതരതൊഴിലുകള്‍ക്കായി 20 കോടി നല്‍കും. ആശ വര്‍ക്കര്‍മാരുടെ ഓണറേറിയം 500 രൂപ വര്‍ധിപ്പിച്ചു. പാചകത്തൊഴിലാളികളുടെ കൂലി 50 രൂപ കൂട്ടുമെന്നും മന്ത്രി വ്യക്തമാക്കിയിട്ടുണ്ട്.