സംസ്ഥാനത്തെ കോൺഗ്രസ് BJPയുടെ ബി ടീം; പ്രതിപക്ഷത്തെ നിയന്ത്രിക്കുന്നത് ചെന്നിത്തല - വി.മുരളീധരൻ അച്ചുതണ്ട്: കോടിയേരി

തിരുവനന്തപുരം: സംസ്ഥാനത്തെ കോൺഗ്രസ് ബി ജെ പിയുടെ ബി ടീമാണെന്ന് സി പി എം സംസ്ഥാന സെക്രട്ടറി കോടിയേരി ബാലകൃഷ്ണൻ. രമേശ് ചെന്നിത്തല - വി.മുരളീധരൻ കൂട്ടുകെട്ടാണ് പ്രതിപക്ഷത്തെ ഇപ്പോൾ നിയന്ത്രിക്കുന്നതെന്നും കോടിയേരി ബാലകൃഷ്ണൻ ആരോപിച്ചു.

സ്പ്രിങ്ക്ളർ ഇടപാടുമായി ബന്ധപ്പെട്ട കേസിൽ ഇരുപാർട്ടികളും ഒത്തുകളിച്ചു. രമേശ് ചെന്നിത്തലയുടെ ഹർജിക്ക് പിന്തുണ നൽകും വിധമാണ് കേന്ദ്രസർക്കാർ ഹൈക്കോടതിയിൽ നിലപാട് എടുത്തത്.

ബിജെപി സംസ്ഥാന പ്രസിഡന്റ് കെ.സുരേന്ദ്രനെ മിണ്ടാൻ പോലും അനുവദിക്കാതെ കേന്ദ്രമന്ത്രി വി.മുരളീധരൻ ദൈനംദിന രാഷ്ട്രീയ അഭിപ്രായങ്ങൾ നടത്തുകയാണെന്നും കോടിയേരി പരിഹസിച്ചു.

മുഖ്യമന്ത്രി പിണറായി വിജയന്റെ കുടുംബത്തെ പ്രതിപക്ഷം ലക്ഷ്യമിട്ടത് തരംതാണ രാഷ്ട്രീയമാണെന്നും കോടിയേരി ചൂണ്ടിക്കാട്ടി. മുഖ്യമന്ത്രിക്ക് എതിരെയുള്ള ആരോപണങ്ങൾ ഏശാതെ വന്നപ്പോഴാണ് കുടുംബത്തെ വലിച്ചിഴച്ചത്. ഇത്തരം രാഷ്ട്രീയത്തോട് സിപിഎമ്മിന് എന്നും എതിർപ്പാണ്.

കെ.കരുണാകരനെ പിന്തുടർന്ന് വേട്ടയാടിയവരാണ് ഇന്ന് കോൺഗ്രസിന്റെ അമരത്ത്. അവരിൽ നിന്ന് ഇതിൽ കൂടുതലൊന്നും പ്രതീക്ഷിക്കേണ്ടെന്നും കോടിയേരി പറഞ്ഞു.

മഹാമാരി രാഷ്ട്രീയ പാർട്ടികൾക്ക് മേൽ വലിയ ഉത്തരവാദിത്തമാണ് നൽകിയിരിക്കുന്നത്. പുതിയ വെല്ലുവിളികളും ഉത്തരവാദിത്തങ്ങളും രാഷ്ട്രീയ പാർട്ടികൾ ഏറ്റെടുക്കേണ്ടി വരും. കേരളം സാമ്പത്തികമായി പ്രതിസന്ധിയിൽ ആണെങ്കിലും കോവിഡിന് ശേഷമുള്ള കാലം ധാരാളം സാധ്യതകൾ തുറന്നിടുന്നുണ്ട്. ഇത് വിവാദങ്ങൾ മൂലം ഇല്ലാതാക്കരുതെന്നും കോടിയേരി അഭ്യർത്ഥിച്ചു.

കൈരളി ടിവി ചീഫ് എഡിറ്റർ ജോൺ ബ്രിട്ടാസിനു നൽകിയ അഭിമുഖത്തിലാണ് കോടിയേരി ഇക്കാര്യങ്ങൾ പറഞ്ഞത്‌.