KV Vijayadas | കെ.വി വിജയദാസ്: ഈ നിയമസഭാ കാലയളവില്‍ മരിക്കുന്ന ഏഴാമത്തെ സാമാജികൻ

ഈ നിയമസഭാ കാലയളവില്‍ മരിക്കുന്ന ഏഴാമത്തെ നിയമസഭാ സാമാജികനാണ് കോങ്ങാട് എംഎൽഎ കെ.വി വിജയദാസ്. കോവിഡ് ബാധിച്ച് തൃശൂർ മെഡിക്കൽകോളേജ് ആശുപത്രിയിൽ ചികിത്സയിൽ ആയിരുന്നു. സംസ്ഥാനത്ത് ഇത് ആദ്യമായാണ് കോവിഡ് ബാധിച്ച് ഒരു നിയമസഭാംഗം മരിക്കുന്നത്. പാലക്കാട് ജില്ല പഞ്ചായത്തിന്റെ ആദ്യ പ്രസിഡന്റാണ്. കെ.കെ രാമചന്ദ്രന്‍ നായര്‍, പി.ബി അബ്ദുള്‍റസാഖ്, കെ.എം മാണി, തോമസ് ചാണ്ടി, വിജയൻ പിള്ള, സി.എഫ് തോമസ് എന്നിവരായിരുന്നു ഈ നിയമസഭാ കാലത്ത് വിടപറഞ്ഞ മറ്റു സാമാജികര്‍.

കെ.കെ രാമചന്ദ്രൻ നായർ(ചെങ്ങന്നൂർ)- സിപിഎം നേതാവും ചെങ്ങന്നൂർ നിയമസഭാംഗവുമായിരുന്നു കെ.കെ. രാമചന്ദ്രൻ നായർ. കരൾ രോഗത്തെ തുടർന്ന് 2018 ജനുവരി 14-ന് ചെന്നൈയിലെ അപ്പോളോ ആശുപത്രിയിൽ വച്ചാണ് രാമചന്ദ്രൻ നായർ അന്തരിച്ചത്. എന്നും കോൺഗ്രസിനോട് കൂറ് പുലർത്തിയിരുന്ന ചെങ്ങന്നൂരിൽ രാമചന്ദ്രനായരുടെ ജനകീയതയിലൂടെ പി.സി.വിഷ്ണുനാഥിനെ പരാജയപ്പെടുത്തിയാണ് സി.പി.എം മണ്ഡലം പിടിച്ചെടുത്തത്. ഉപതിരഞ്ഞെടുപ്പിൽ സജി ചെറിയാനെ കളത്തിലിറക്കി മണ്ഡലം സി.പി.എം നിലനിർത്തി.

മഞ്ചേശ്വരത്ത് നിന്ന് രണ്ടാം തവണ നിയമസഭാ അംഗമായിരിക്കെ 2018 ഒക്ടോബർ 20നാണ് റസാഖ് അന്തരിച്ചത്.

കെ.എം മാണി (പാലാ)- ഏറ്റവും കൂടുതൽ കാലം നിയമസഭാംഗമായതിന്‍റെയും ഏറ്റവുമധികം തവണ ബജറ്റ് അവതരിപ്പിക്കുകയും (13 തവണ) ചെയ്ത ധനമന്ത്രിയുമായിരുന്ന കെ.എം. മാണി ഈ സഭയുടെ കാലത്താണ് വിടപറഞ്ഞത്. കേരള കോൺഗ്രസ് പാർട്ടിയുടെ അമരക്കാരനായിരുന്നു കെ.എം മാണി. അസുഖബാധിതനായിരുന്ന കെ.എം മാണി 2019 ഏപ്രിൽ അഞ്ചിന് കൊച്ചിയിലാണ് അന്തരിച്ചത്.

തോമസ് ചാണ്ടി (കുട്ടനാട്)- മൂന്നു തവണ കുട്ടനാട് മണ്ഡലത്തെ പ്രതിനിധീകരിച്ച തോമസ് ചാണ്ടി അർബുദ ബാധയെ തുടർന്നാണ് അന്തരിച്ചത്. 2019 ഡിസംബർ 20ന് കൊച്ചിയിലായിരുന്നു അദ്ദേഹത്തിന്‍റെ അന്ത്യം.

വിജയൻ പിള്ള- 2016 ലെ നിയമസഭാ തെരഞ്ഞെടുപ്പിൽ ഇടതു സ്വതന്ത്ര്യനായി ചവറയിൽ മത്സരിച്ച് കന്നി അങ്കം തന്നെ ജയിച്ച് നിയമസഭയിലെത്തിയ വ്യക്തിയാണ് വിജയൻ പിള്ള. 20202 മാർച്ച് എട്ടിന് കൊച്ചിയിലെ സ്വകാര്യ ആശുപത്രിയിലായിരുന്നു അന്ത്യം.

സി.എഫ് തോമസ്- കേരളാ കോൺഗ്രസ്സ് (എം) മുതിർന്ന നേതാവായിരുന്ന സി.എഫ് തോമസ് 2016ൽ ഉൾപ്പടെ ഒമ്പത് തവണ (1980, 1982, 1987, 1991, 1996, 2001 , 2006, 2011, 2016) തുടർച്ചയായി ചങ്ങനാശ്ശേരി നിയോജകമണ്ഡലത്തിൽ നിന്നും തിരഞ്ഞെടുക്കപ്പെട്ടിട്ടുണ്ട്. തിരുവല്ലയിലെ സ്വകാര്യ ആശുപത്രിയിൽ സെപ്റ്റംബർ 27നായിരുന്നു അദ്ദേഹം അന്തരിച്ചത്. കേരള കോണ്‍ഗ്രസ് ഡെപ്യൂട്ടി ചെയര്‍മാനാണ്. 2001-2006 കാലത്ത് യുഡിഎഫ് മന്ത്രിസഭയിൽ അംഗമായിരുന്നു. ഖാദി, ഗ്രാമ വികസന വകുപ്പാണ് സി.എഫ് തോമസ് കൈകാര്യം ചെയ്തിരുന്നത്.