മുഖ്യമന്ത്രിക്കെതിരെ ഫേസ്ബുക്ക് പോസ്റ്റ്: ജീവനക്കാരനെ തിരിച്ചെടുത്തു

തിരുവനന്തപുരം: മുഖ്യമന്ത്രി പിണറായി വിജയനെതിരെ ഫേസ്ബുക്ക് പോസ്റ്റിട്ടതിന് സസ്പെൻഡ് ചെയ്ത സർക്കാർ ജീവനക്കാരനെ തിരിച്ചെടുത്തു. നിയമവകുപ്പിലെ ജീവനക്കാരനായ ഒ.പി അശോക് കുമാറിനെയാണ് തിരിച്ചെടുത്തത്. മൂന്നു മാസത്തെ സസ്പെൻഷന് ശേഷമാണ് തിരിച്ചെടുത്തത്.

ജൂൺ 15നാണ് ഒ.പി അശോക് കുമാറിനെ സസ്പെൻഡ് ചെയ്തത്. നിയമവകുപ്പിലെ അറ്റൻഡറും ലോ സെക്രട്ടറിയേറ്റ് അസോസിയേഷൻ എക്സിക്യൂട്ടീവ് കമ്മിറ്റി അംഗവുമാണ് ഒ.പി അശോക് കുമാർ.

നേരത്തെ ലോ സെക്രട്ടറിയേറ്റ് അസോസിയേഷൻ ജനറൽ സെക്രട്ടറി എം.എസ് മോഹനചന്ദ്രനെയും സമാന കാരണത്തിന് സസ്പെൻഡ് ചെയ്തിരുന്നു. നിയമവകുപ്പിലെ കോൺഗ്രസ് അനുകൂല സംഘടനയാണ് ലോ സെക്രട്ടറിയേറ്റ് അസോസിയേഷൻ.