കോവിഡിനെതിരെ പോരാടാൻ ഒരുങ്ങി മലപ്പുറം ജില്ലാ ഭരണകൂടം; ചികിത്സാക്കാലത്തും സജീവമായി കളക്ടർ അടക്കമുള്ളവർ

മലപ്പുറം: ജില്ലയിൽ കോവിഡിനെതിരായ പോരാട്ടത്തിന് നേതൃത്വം കൊടുക്കുന്നവർക്ക് രോഗം സ്ഥിരീകരിച്ചു എങ്കിലും പോരാട്ടം തുടരുക തന്നെയാണ്. കളക്ടറും മറ്റ് ഉന്നത ഉദ്യോഗസ്ഥരും രോഗം സ്ഥിരീകരിച്ച് ചികിത്സയിലേക്ക് മാറിയതോടെ കോട്ടക്കൽ ആര്യവൈദ്യശാലയുടെ സെന്റിനറി കെട്ടിടമാണ് ഇനി മുതൽ കുറച്ച് ദിവസത്തേക്ക് ഭരണ സിരാകേന്ദ്രം ആകുക.

കളക്ടറും സബ് കളക്ടറും എസിപിയും  അടക്കം ഉളളവർ ഇവിടെ ആണ് ചികിത്സയിൽ കഴിയുന്നത്. ഭരണ നിർവഹണം പിഴവ് ഇല്ലാതെ നടക്കാൻ ഉള്ള സൗകര്യം ആണ് ആരോഗ്യവിഭാഗം സജ്ജമാക്കിയത്.

കോട്ടക്കൽ ആര്യ വൈദ്യശാല സെന്റിനറി ബ്ലോക്ക് കോവിഡ് കെയർ ആശുപത്രിയാക്കി മാറ്റിയത് മണിക്കൂറുകൾ കൊണ്ടാണ്. അധികൃതർ ഇങ്ങനെ ഒരു ആവശ്യം അറിയിച്ച ഉടനെ കോട്ടക്കൽ ആര്യവൈദ്യശാല അധികൃതർ അതിന് സമ്മതം നൽകി പിന്തുണ പ്രഖ്യാപിക്കുകയായിരുന്നു.

കുറച്ചു ദിവസമായി കളക്ടർ അടക്കം ഉളളവർ ഓൺലൈൻ വഴിയാണ് യോഗങ്ങളിൽ പങ്കെടുക്കുന്നതും തീരുമാനങ്ങൾ ചർച്ച ചെയ്ത് നടപ്പാക്കുന്നതും. ഇതിന് ആവശ്യമായ ഇന്റർനെറ്റ് സൗകര്യങ്ങൾ അടക്കം എല്ലാം കോട്ടക്കലിൽ സജ്ജമാക്കിയിട്ടുണ്ട്. രോഗം ആരോഗ്യ സ്ഥിതി മോശമാക്കാത്ത സാഹചര്യത്തിൽ ആലോചന യോഗങ്ങളും മറ്റും ഓൺലൈൻ വഴി സംഘടിപ്പിക്കാൻ ഇവിടെ നിന്നും സാധിക്കും.

ഒരു തരത്തിലും ഭരണപരമായ കാര്യങ്ങളിൽ തടസം ഉണ്ടാകില്ലെന്ന് ഉറപ്പാക്കാൻ ഇതുവഴി സാധിക്കും. ആറു ഡോക്ടർമാരും 20 നഴ്സുമാരും ഇവിടെ ഡ്യൂട്ടിയിൽ ഉണ്ട്. കളക്ടറും മറ്റ് ഭരണ നിർവഹണ വിഭാഗത്തിലെ ഉന്നതരും കോവിഡിന്റെ പിടിയിൽ ആയത് വൈറസിന് എതിരായ പോരാട്ടത്തിന് തിരിച്ചടി ആകാതിരിക്കുന്നത് ഇങ്ങനെ ആണ്.