നായയെ പിന്നിൽ നിർത്തി ഹെൽമറ്റ് ഇല്ലാതെ ബൈക്കോടിച്ച യജമാനൻ കുടുങ്ങി; വീഡിയോ പകർത്തി മോട്ടോർ വാഹന വകുപ്പ്

കോട്ടയം: വളർത്തുനായയെ പിന്നിൽ നിർത്തി ഹെൽമറ്റില്ലാതെ ബൈക്കോടിച്ച യജമാനൻ കുടുങ്ങി. മോട്ടോർ വാഹന വകുപ്പാണ് നിയമ ലംഘനം കൈയോടെ പൊക്കിയത്. വാഹന ഉടമയ്ക്ക് പിഴ അടയ്ക്കാൻ നോട്ടീസും ലഭിച്ചു.

ഏഴു ദിവസത്തിനകം പിഴ അടയ്ക്കണമെന്നാണ് നോട്ടീസിൽ പറയുന്നത്. ആർ ടി ഓഫീസിൽ നേരിട്ട് ഹാജരായി വിശദീകരണം നൽകുകയും വേണം. ഇന്നലെ ഉച്ചയ്ക്ക് 11.40ന് കെ കെ റോഡിലായിരുന്നു സംഭവം.

മോട്ടോർ വാഹന വകുപ്പ് എൻഫോഴ്‌സ്‌മെന്റ് ആർ.ടി.ഒ ടോജോ എം.തോമസിന്റെ നേതൃത്വത്തിലുള്ള സംഘം വാഹന പരിശോധന നടത്തുകയായിരുന്നു. ഇതിനിടെയാണ് ബൈക്കിൽ വിലസി വന്ന നായയും ഉടമസ്ഥനും മുന്നിൽപ്പെട്ടത്. മോട്ടോർ വെഹിക്കിൾ ഇൻസ്‌പെക്ടർ എ.സാബു യാത്ര കാമറയിൽ പകർത്തി. തുടർന്ന് കേസ് രജിസ്റ്റർ ചെയ്യുകയായിരുന്നു.